کورني او نړۍوال سوداګر دې د افغانستان د درملو په سکتور کې پانګونه وکړي
د طالبانو د عامې روغتیا وزیر نورجلال جلالي کورنیو او نړۍوالو سوداګرو ته د افغانستان د درملو په سکتور کې د پانګونې بلنه ورکړې. نوموړي ویلي، طالبانو په افغانستان کې د پانګونې لپاره ښه فرصتونه برابر کړې دي.
یاد طالب وزیر په کابل کې د «ابو علي سینا» څلور ورځنی نندارتون د کورنیو تولیداتو د پیاوړتیا او د صنعت د ودې لپاره یو مهم ګام بللی او وايي، کورني او نړۍوال سوداګر دې په افغانستان کې د پانګهونې لپاره د چمتو شویو فرصتونو څخه ګټه واخلي.
پر همدغه مهال د طالبانو د عامې روغتیا وزارت د خوړو او درملو مرستیال حمدالله زاهد ویلي، چې د ابو علي سینا څلور ورځني نندارتون کې د ګډونوالو، چارواکو او خصوصي سکتور ترمنځ د همکاریو یو شمېر هوکړه لیکونه هم لاسلیک شوي دي، چې د درملو د صنعت د ودې لپاره مهم ګام بلل کېږي.
طالبانو پرداسې مهال په افغانستان کې د درملو په برخه کې له پانګهوالو څخه د پانګهوني غوښتنه کړې، چې دمګړی د افغانستان د درملو مارکیټ د ایراني او پاکستاني درملو په واک کې دی او هېوادوال د درملو د ټیټ کیفیت په اړه خورا ډېر شکایتونه لري.
