د ۲۰۲۵ کال له پیل راهیسې،د جرمني په مالي مرسته یوازې شاوخوا ۲۲۰کسان په داوطلبانه ډول افغانستان ته ستانه شوي، په داسې حال کې چې په همدې موده کې شاوخوا ۴۵۰۰ کسان سوریې ته ستانه شوي دي. د جرمني رسنیو ویلي، د هغو کسانو شمېر ډېر لږ دی، چې د ستنېدو لپاره یې له مالي هڅونې ګټه اخیستې ده.
د جرمني رسنیو راپور ورکړی، چې په افغانستان او سوریه کې اقتصادي وضعیت په ورته ډول ډېر خراب دی، خو د بېرته ستنېدونکو په شمېر کې دا توپیر ښيي، چې یوازې پیسې خلک بېرته ستنېدو ته نهشي هڅولای.
د دغه راپور پر بنسټ، افغانستان یا سوریې ته بېرته ستنېدونکي کسان د الوتکې د ټکټ او څو سوه یورو د سفري لګښت ترڅنګ، د نوي ژوند د پیلولو لپاره شاوخوا زر یورو ترلاسه کوي. دا مرسته د کورنیو لپاره تر څلور زره یورو پورې رسېږي.
په راپور کې راغلي، د جرمني د کین اړخي ګوند په څېر دا استدلال کېدای شي چې دا مرستې په اصلي هېواد کې د یوه مناسب ژوند د پیلولو لپاره لږ دي.
«فرانکفورټر الګماینه» ورځپاڼې لیکلي، چې په ۲۰۲۵ کال کې د جرمني د فدرالي حکومت د داوطلبانه ستنېدو د پروګرام «ریاګ/ګارپ» مستقیم لګښت شاوخوا ۲۰ میلیونه یورو وو.
په دغه راپور کې دا هم راغلي، چې ځینې نور هېوادونه له بېرته ستنېدونکو سره ډېره مرسته کوي او جرمني هم په تېرو وختونو کې په اصلي هېواد کې د نوي ژوند د جوړولو لپاره پراخې مرستې کولې.
له دې سره سره، دغې رسنۍ لیکلي، چې سوریې ته د بېرته ستنېدونکو په اړه هم همدا وضعیت دی.
د دغه راپور لهمخې، په داوطلبانه ستنېدو کې اصلي پوښتنه یوازې د پیسو د مقدار په اړه نهده، بلکې دا ده، چې خلک تر کومې کچې د خپل هېواد پر سیاسي وضعیت باور او اعتماد لري.
فرانکفورټر الګماینه لیکلي، چې افغانستان او سوریه له دې اړخه اوس په دوو جلا او داسې لارو روان دي چې یو له بل سره توپیر لري.
