د امریکا د ملي استخباراتو ادارې مشرې تولسي ګبارډ له خپلې دندې استعفا وکړه

د ګبارډ د دندې وروستۍ ورځ به د ۲۰۲۶ کال د جون ۳۰مه وي. هغې په خپل استعفالیک کې ویلي، چې مېړه یې ابراهیم د ناروغۍ له امله په راتلونکو اونیو او میاشتو کې له لویو ننګونو سره مخ کېږي او هغه باید په دې سخته مبارزه کې د هغه تر څنګ ودرېږي. ګبارډ زیاته کړې، چې مېړه یې د دوی د ګډ ژوند په ۱۱ کلونو کې د هغې لوی ملاتړی وو او نه‌شي کولای هغه په دې مبارزه کې یوازې پرېږدي.

د امریکا د ملي استخباراتو مشرې د خپلې دندې پر مهال د استخباراتي ټولنې د شفافیت او بشپړتیا په برخه کې د پرمختګونو یادونه کړې، خو ټینګار یې کړی، چې لا هم ډېر کارونه پاتې دي.

هغې ولسمشر ټرمپ ته ډاډ ورکړی، چې په راتلونکو اونیو کې به د واک د لېږد بهیر په سمه توګه ترسره شي، څو د استخباراتي ادارې په رهبرۍ کې کوم خنډ رامنځته نه‌شي.

ګبارډ په تېر یو نیم کال کې د امریکا په استخباراتي ادارو کې پراخ بدلونونه راوستل، چې په‌کې د لګښتونو کمول او د ۷۰۰ میلیونه ډالرو سپما شامل دي. هغې همدارنګه تر نیم میلیون ډېر پټ اسناد، له هغې ډلې د ټرمپ او روسیې د اړیکو او د جان اف کینیډي د وژنې په اړه معلومات افشا کړل.

د دې ترڅنګ، د هغې په مشرۍ له ترهګرۍ سره د مبارزې ملي مرکز په ۲۰۲۵ کال کې امریکا ته د ۱۰ زره هغو کسانو د ننوتلو مخه ونیوله چې له مخدره توکو او ترهګرۍ سره یې تړاو درلود.