د افغان ښځینه‌و کرېکټ جلاوطنه لوبډله انګلستان ته ځي

د یادې لوبډلې تر ۲۰ ډېرې غړې چې پخوا د افغانستان ملي لوبډلې غړې وې؛ له ۲۰۲۱کال راهیسې په اسټرالیا کې مېشتې دي. په افغانستان کې طالبانو د نورو محدودیتونو ترڅنګ ښځې له ورزش نه هم راګرځولې دي.
یادې لوبډلې خپله لومړۍ لوبه د ۲۰۲۵کال په جنورۍ کې په ملبورن کې ترسره کړه. په دغه نوې لوبلړۍ کې د شل اوریزو لوبو او د روزنې فرصتونه شامل دي.
دغه لوبغاړې به د انګلستان په نړۍوالو شل اوریزو سیالیو په پای لوبه کې هم ګډون وکړي. د انګلستان او ولز کرېکټ بورډ دغه سفر له کلتوري او ورزشي پلوه مهم بللی دی.
د کرېکټ نړۍوالې شورا د تېر کال په اپرېل میاشت کې د جلاوطنه افغان ښځینه لوبغاړو د ملاتړ لپاره یوه ځانګړې کاري ډله جوړه کړه. یادې شورا د انګلستان، اسټرالیا او هند د کرېکټ بورډونو په مرسته د دغه لوبغاړو لپاره د مالي ملاتړ صندوق جوړ کړ.