د برېتانیا سمندري سوداګریز مرکز: د منځني ختیځ وضعیت لاهم د اندېښنې وړ دی
د برېتانیا د سمندري سوداګرۍ مرکز د منځني ختیځ په سمندري سیمه کې د ګواښ کچه لاهم «جدي» بللې او ویلي یې دي، چې د هرمز تنګي له لارې تګراتګ لا هم په څرګند ډول کم شوی؛ خو په تېرو ۴۸ ساعتونو کې په دغه سیمه کې د امنیت اړوند هېڅ پېښه نهده راپور شوې.
دغه ادارې چې د برېتانیا سمندري ځواک برخه ده، د پنجشنبې په ورځ ویلي: «د سمندري تګراتګ د بېلو شویو لارو دننه او شاوخوا د ماینونو ځای پرځای کول لاهم یو ګواښ ګڼل کېږي».
د دغه مرکز د معلوماتو له مخې؛ سوداګریزې بېړۍ لاهم د عمان خلیج او د عرب سمندر په شمال کې د امریکا سمندري ځواکونو ته راپورونه ورکوي او د امریکا له لوري سمندري کلابندي دوام لري.
د برېتانیا د سمندري سوداګرۍ مرکز په بابالمندب او عدن خلیج کې سوداګریز تګراتګ لاهم «باثباته» بللی دی.
