د پاکستان د پوځ مشر له ایراني چارواکو سره د خبرو لپاره تهران ته ورسېد
د ایران خبري اژانس اېرنا په اسلام اباد کې د یوې ډیپلوماتیکې سرچینې په حواله راپور ورکړی، چې د پاکستان د پوځ مشر فیلډ مارشال عاصم منیر ایران ته رسېدلی او ټاکل شوې ده، چې د ایران له لوړپوړو چارواکو سره وګوري.
عاصم منیر ایران ته دا سفر پر داسې مهال کړی، چې د پاکستان د کورنیو چارو وزیر محسن نقوي د دریمې پرله پسې ورځې لپاره په تهران کې دی او له بېلالېو لوړپوړو ایراني چارواکو سره یې کتلي دي.
پاکستان د امریکا او ایران په خبرو اترو کې منځګړیتوب کوي او څارونکي په دې باور دي چې د پاکستان د پوځ مشر او د کورنیو چارو وزیر د دې سفر په جریان کې تهران ته د واشنګټن د پیغام په رسولو کې بوخت دي.
دا په تیرو پنځو اونیو کې تهران ته د پاکستان د پوځ مشر دوهم سفر دی.
