د سپینې ماڼۍ څنګ ته ډزې؛ پولیس وایي شکمن کس یې نیولی دی
امریکایي رسنیو راپور ورکړی، چې د سپینې ماڼۍ تر څنګ د ډزو غږونه اورېدل شوي او پولیسو یې په تړاو یو شکمن کس تر نیولو وروسته روغتون ته لېږدولی دی. راپورونه وایي، شکمن کس سپینې ماڼۍ ته نږدې د تلاشۍ پوستې ته له نږدې کېدو وروسته د امنیتي کسانو پر لوري یې ډزې کړي.
د یوه پولیس چارواکي په وینا، په پېښه کې هېڅ یو امنیتي ته زیان نه دی رسېدلی.
له دې سره هممهاله د امریکا د فدرالي پلټنو ادارې (FBI) مشر کش پټېل په خپله اېکسپاڼه لیکلي، چې کسان یې د سپینې ماڼۍ په ساحه کې ځای پر ځای شوي دي.
سياېناېن هم راپور ورکړی، چې د دې پېښې له امله امنیتي ځواکونو د سپینې ماڼۍ په انګړ کې موجود خبریالان خوندي سیمو ته لېږدولي دي.
د امریکا د پټو خدماتو ادارې ویاند په یوې اعلامیې کې سيبياېس نیوز ته ویلي، چې دغه اداره «د شمال لوېدیځ پنسلوانیا سړک او اوولسم سړک ته نږدې د ډزو له راپورونو» خبره ده او «له امنیتي ځواکونو سره په ګډه د دغو معلوماتو د ارزونې او تایید چارې روانې دي».
تر اوسه امریکايي چارواکو د دې پېښې د څرنګوالي په اړه نور جزییات نه دي خپاره کړي.
