د امریکا حکومت د ایبولا ناروغۍ د خپرېدو مخنیوي لپاره نوي سفري محدودیتونه اعلان کړي
د امریکا د بهرنیو چارو وزارت د سفري او قونسلي خدمتونو څانګې خبرداری ورکړی چېد ایبولا ناروغۍ د خپرېدو مخنیوي لپاره حکومت تازه سفري محدودیتونه وضع کړي دي.
د دغه خبرداري له مخې، هغه امریکايي وګړي او د ګرینکارټ لرونکي کسان چې په تېرو ۲۱ ورځو کې د کانګو ډیموکراتیک جمهوریت، یوګانډا یا سویلي سوډان کې پاتې شوي وي، امریکا ته به یوازې د ځانګړو هوايي ډګرونو له لارې دننه کیږي او په دغو هوايي ډګرونو کې به د ایبولا ځانګړې روغتیايي معاینات ترسره کېږي.
هغه میدانونه چې روغتیایي تدابیر ورته نیول شوي د واشنګټن ډلس نړیوال هوايي ډګر، د اټلانتا نړیوال هوايي ډګر او هوسټن جورج بوش نړیوال هوايي ډګر دی.
د دغه وزارت په خبره، مسافر دې د الوتنو د بدلون یا لغوه کېدو لپاره هم چمتو وي او له سفر مخکې دې له خپل هوايي شرکت سره اړیکه ونیسي.
تر دې وړاندېد ملګرو ملتونو د روغتیا نړیوال سازمان اعلان کړی وه چې کانګو او یوګانډا کې د «بونډيبوجیو» ویروس له امله د ایبولا ناروغۍ خپرېدل د نړیوالې اندېښنې وړ عامه روغتیايي بېړنی حالت رامنځته کړی.
دغه سازمان همداراز سپارښتنه کړې وه چې هېوادونه دې خپلې پولې نه تړي او پر سفرونو او سوداګرۍ دې محدودیتونه نه لګوي، ځکه د دوی په وینا دا ډول اقدامات علمي بنسټ نه لري او ښايي د ناروغۍ د کنټرول هڅې لا ستونزمنې کړي.
