په چین کې د ډبرو سکرو په یوه کان کې د چاودنې له امله ۹۰ کسان وژل شوي دي
د چین د شانشي ولایت په چینیوان ولسوالۍ کې د ډبرو سکرو په يوه کان کې د چاودنې له امله لږ ترلږه ۹۰ کان کېندونکي وژل شوي دي. چارواکو دا پېښه له ۲۰۰۹ کال راهیسې په دغه هېواد کې د کانونو تر ټولو خونړۍ او مرګونې پېښه بللې ده.
د چین شینهوا خبري اژانس راپور ورکړی، یاده پېښه د جمعې په ورځ هغه مهال رامنځته شوه، چې په کان کې سلګونه متره لاندې ۲۴۷ کارګر په کار بوخت وه.
د راپورونو لهمخې، د ژغورنې عملیات په شدت سره روان دي او د پېښې د رامنځته کېدو اصلي لامل تر څېړنې لاندې دی. د قیچاشا» د شرکتونو د ډیټابیس معلومات ښيي چې د دغه کان چارې د «شانشي تونګژو ګروپ لیوشینیو کول انډسټري» لخوا مخته وړل کېدې؛ دا شرکت په ۲۰۱۰ کال کې تاسیس شوی او د «شانشي تونګژو کول کوکینګ ګروپ» تر کنټرول لاندې کار کوي.
په ورته مهال د چین ولسمشر شي جین پینګ له ټولو اړوندو چارواکو وغوښتل چې د ټپیانو د درملنې او د ورکو شویو کسانو د پلټنې او ژغورنې په عملیاتو کې له «هیڅ ډول هڅې درېغ ونه کړي». نوموړي دغه راز امر وکړ چې د پېښې د علت په اړه دې دقیقې څېړنې وشي.
