طالبان وايي په تورخم کې یې له پاکستان څخه د تازه مېوو د قاچاق مخه نیولې
په ننګرهار کې د طالبانو رسنیز دفتر ویلي، چې په تورخم کې یې له یوې باروړونکې لارۍ څخه ۷۰ کیلوګرامه پاکستاني ام چې په غېرقانوني توګه افغانستان ته قاچاق کېدل، نیولي دي.
په ننګرهار کې د طالبانو رسنیز دفتر ویلي، چې په تورخم کې یې له یوې باروړونکې لارۍ څخه ۷۰ کیلوګرامه پاکستاني ام چې په غېرقانوني توګه افغانستان ته قاچاق کېدل، نیولي دي.
په ننګرهار کې د طالبانو د والي رسنیز دفتر په اېکس کې لیکلي، چې یاد ام په غیرقانوني توګه افغانستان ته قاچاق کېدل.
په خبرپاڼه کې راغلي، چې اوسمهال له پاکستان سره هر ډول سوداګریزې اړیکې بندې دي او دوی له خلکو غوښتې چې د مېوو او نورو سوداګریزو توکو له واردولو څخه په کلکه ډډه وکړي.
د طالبانو مسوولینو زیاته کړې چې د غیرقانوني او منع شویو توکو د واردولو د مخنیوي لپاره یې په تورخم کې د قرنطین مدیریت کارکوونکي هره ورځ د کډوالو او نورو مسافرو موټرونه په جدي توګه پلټي.
دا مېووې په داسې حال کې نیول شوي چې هره ورځ سلګونه افغان کډوال له پاکستان څخه د تورخم له لارې هېواد ته ستنېږي. چارواکي وایي چې د سوداګریزو اړیکو د بندېدو له امله هېڅوک حق نه لري چې د کډوالو د لېږد په پلمه له پاکستان څخه افغانستان ته سوداګریز توکي انتقال کړي.
د طالبانو او پاکستان ترمنځ پر ډیورنډ کرښه د وروستیو نښتو او کړکېچونو له امله د دواړو لورو ترمنځ سوداګري په ټپه درېدلې ده.
