د طالبانو د هوا پوهنې ادارې خبر ورکړی، چې سبا یکشنه، د غبرګولي ۳مه په ۱۳ ولایتونو کې د تېز باران، تالندې او برېښنا او سېلابونو راوتو اټکل شوی. وړاندې طالبانو خبر ورکړی و، چې په تېرو دوو ورځو کې په بېلابېلو ولایتونو کې د سېلابونو له امله ۲۴ کسان مړه شوي دي.
دغې ادارې د یوې خبرپاڼې په خپرولو سره ویلي، چې دغه اټکل د یکشنبې ورځې لپاره د غبرګولي ۳مه د پروان، پنجشیر، بامیان، بلخ، سمنګان، سرپل، کندوز، بغلان، تخار، بدخشان، ننګرهار، کونړ او نورستان ولایتونو لپاره دی.
په خبرپاڼه کې راغلي، چې د باران کچه له ۱۰ تر ۳۵ میليمتره پورې اټکل شوې ده.
طالبانو د یادو ولایتونو له اوسېدونکو څخه غوښتنه کړي، چې د سیندونو له غاړو او هغو سیمو څخه چې د سېلاب خطر پکې شتون لري، له نږدې کېدو څخه ډډه وکړي.
