خیبر پښتونخوا: د ټيټيپي پخوانیو ملګرو ترمنځ نښته کې لږ تر لږه ۲۲ کسان وژل شوي
د خېبر پښتونخوا د کرمې ولسوالۍ په منځنۍ برخه کې د تحریک طالبان پاکستان او د هغې نه بېلې شوې ډلې جمعیت الاحرار ترمنځ په خونړیو خپلمنځي نښتو کې لږ تر لږه ۲۲ تنه وژل شوي دي.
د سیمهییزو سرچینو په وینا، دغه نښتې د مناتو په سیمه کې هغه مهال پیل شوې چې د تحریک طالبان پاکستان مرکزي شورا د جمعیت الاحرار د ځینو قوماندانانو پر ضد د انضباطي ګامونو پرېکړه وکړه.
سرچینې وایي، د جمعیت الاحرار جنګیالیو ته ویل شوي وو چې خپلې وسلې کېږدي او یا د سیمې د طالب قوماندانانو لارښوونې ومني، خو د دواړو لورو ترمنځ ترینګلتیا وروسته په وسلهواله نښته بدله شوه.
د راپورونو له مخې، په دغو نښتو کې د جمعیت الاحرار ۱۹ جنګیالي وژل او د تحریک طالبان پاکستان درې غړي وژل شوي دي.
سرچینو زیاته کړې چې د شخړې د هواري لپاره یوه قومي جرګه هم راغوښتل شوې وه، خو د خبرو پر مهال وضعیت ترینګلی شو او د دواړو ډلو ترمنځ ډزې پیل شوې.
ویل کېږي، جمعیت الاحرار د خپلو وژل شویو کسانو د غچ اخیستو ژمنه کړې او د خپلو غړو انځورونه یې هم په ټولنیزو شبکو کې خپاره کړي دي.
په جلا پېښه کې، امنیتي سرچینو ویلي چې د شمالي وزیرستان د شوال او سپینوام په سیمو کې د وروستیو پوځي عملیاتو پر مهال یو مهم وسلهوال قوماندان، چې جان میر مشهور په تور ثاقب نومېده، له شاوخوا ۳۰ نورو وسلهوالو سره یو ځای وژل شوی دی.
د سرچینو په خبره، نوموړی د چاودېدونکو توکو او کورنیو بمونو په جوړولو کې ماهر بلل کېده او د جګړهییزو تګلارو له امله پېژندل کېده.
ددغه قومندان او ورسره وژل شویو وسله والو په اړه تر اوسه مخالفو وسله والو څه ندي ویلي.
