د روغتیا نړۍوال سازمان په افغانستان کې د راتلونکي لوی اختر په درشل کې د «کریمیا-کانګو» وینې تویېدونکې تبې د احتمالي خپرېدو په اړه جدي خبرداری ورکړی او له ښاریانو، بزګرانو او د څارویو له مالکانو یې غوښتي، چې ځانګړي روغتیايي اصول مراعات کړي.
دغه سازمان له خلکو غوښتي چې د یادې وژونکي ناروغۍ د مخنیوي لپاره جدي تدابیر ونیسي.
د دغه سازمان د لارښوونو له مخې، د څارویو مالکان باید په منظم ډول خپل څاروي وګوري او هر هغه څاروی چې منتن ښکاري باید له نورو جلا شي او د کنو د لیدلو په صورت کې سمدلاسه حیواني کلینک ته یوړل شي، ځکه ژر درملنه کولای شي کورنۍ له دې ناروغۍ وژغوري.
همدارنګه، د روغتیا نړیوال سازمان سپارښتنه کړې چې د څارویو لپاره استوګنځایونه یا پنډغالي باید له کورونو څخه په خوندي واټن کې جوړ شي.
د دې ادارې په وینا، د څارویو پنډغالی باید د خلکو له کورونو څخه لږ تر لږه له ۵۰ تر ۱۰۰ مترو پورې لرې وي.
له بلې خوا، دغه سازمان له هغو کسانو چې له څارویو سره سروکار لري، غوښتي چې محافظتي او روښانه رنګ لرونکې جامې واغوندي. د روغتیا نړیوال سازمان په وینا، دا کار د خلکو په ساتنه کې مرسته کوي او له څارویو سره د چلند پر مهال د هر ډول کنو لیدل اسانه کوي.
د کانګو تبې په اړه خبردارۍ پرداسې مهال ورکړل شوی، د یاد سازمان د معلوماتو لهمخې، په افغانستان کې یوازې د اپرېل په میاشت کې لږ تر لږه ۲۱۵ کسان د بېلابېلو ساري ناروغیو له امله مړه شوي دي.
