د طالبانو د اطلاعاتو او کلتور وزارت ویلي، چې د پکتیکا ولایت د مټاخان ولسوالۍ په رشکي غونډۍ سیمه کی یې د کیندونو پرمهال ۸۴ قلمه لرغوني او تاریخي اثار موندلي دي. طالبانو ویلي، چې کشف شوي اثار د کوشاني او ساساني دورو پورې تړاو لري.
د طالبانو د اطلاعاتو او کلتور وزارت نن شنبه، د غبرګولي پر ۲مه په اېکس کې لیکلي، چې دغه اثار د لرغونپېژندنې ریاست د مسلکي پلاوي د څېړنو په ترڅ کې موندل شوي دي.
د طالبانو د معلوماتو لهمخې، کشف شوي اثار د کوشاني او ساساني دورو پورې تړاو لري او تاریخي مخینه یې له لومړۍ څخه تر څلورمې میلادي پېړۍ پورې رسېږي.
په دغو موندنو کې د ودانیزو پاتېشونو ترڅنګ له ډبرو، خټو، هډوکو، ښیښو او فلزاتو څخه جوړ شوي توکي شامل دي.
د لرغونپوهانو په وینا، د موندل شویو اثارو له مخې دغه سیمه په تېرو زمانو کې د خټینو لوښو د جوړولو د کارخونې په توګه کارېدله.
طالب چارواکو ویلي، چې کشف شوي اثار د ثبت او راجستر کولو له پروسې وروسته د پکتیکا ولایت د اطلاعاتو او کلتور ریاست ته سپارل شوي او غیر لېږد اثار هم په معیاري ډول خوندي شوي دي.
د طالبانو مسوولینو ویلي، چې دا ډول کیندنې د تاریخ د پټو برخو د روښانولو او د موزیمونو د بډاینې لامل ګرځي، چې دا چارې خلک له تېر کلتور سره اشنا کوي او د سیمې اوسېدونکو ته د کار زمینه هم برابروي.
