د ملګرو ملتونو د بشري مرستو د همغږۍ ادارې (اوچا) د افغانستان د دفتر مشرې اېمي مارټین، ننګرهار ولایت ته د خپل سفر پر مهال ویلي، هغه کورنۍ چې د سیند غاړو مېشت وو، سختو سېلابونو زیانمنې کړې دي او اوس بېړنیو او اوږدمهالو مرستو ته اړتیا لري.
نوموړې ویلي، مرستندویه ادارو زیانمنو شویو کورنیو ته لنډمهاله سرپناه، خوراکي توکي او غیرخوراکي مرستې رسولې دي، خو د خلکو اړتیاوې لا هم پراخې دي.
د اېمي مارټین په وینا، د سیمې خلک له بېلابېلو ستونزو سره مخ دي. ځینې کورنۍ ځکه خپلو سیمو ته بېرته ستنېدای نه شي چې د سیند پر غاړه یې ژوند کاوه او شخصي ځمکه نه لري او ځینې نور یوازې د خپلو ویجاړو شویو کورونو د بیا رغونې او ترمیم غوښتنه کوي.
هغې ټینګار وکړ چې افغانستان د اقلیمي بدلونونو له سختو اغېزو سره مخ هېواد دی او د واورو له ویلې کېدو سره به د سېلابونو ګواښ لا زیات شي.
د اوچا د افغانستان مشرې زیاته کړې: «په افغانستان کې زموږ لویه ستونزه د مرستو د بودجې کمښت دی. موږ تر اوسه یوازې د اړتیا وړ بودجې ۴۰ سلنه ترلاسه کړې ده.»
نوموړې یادونه کړې چې یوازې نهه میاشتې وړاندې همدې سیمې زلزله هم تجربه کړې وه او ډېر شمېر خلک لا هم بېځایه شوی ژوند کوي او دایمي حللارې ته اړتیا لري.
اېمي مارتین له نړیوالې ټولنې غوښتي چې د افغانستان له زیانمنو خلکو سره د لنډمهالو، انتقالي او دایمي استوګنځایونو د برابرولو لپاره خپلې مرستې زیاتې کړي.
