د پاکستان لومړی وزیر شهباز شریف د یوه څلور ورځنې ورځني رسمي سفر په موخه د چین د هانګژو ښار ته په سفر لاړ. د پاکستان د بهرنیو چارو وزارت وايي، چې د دغه سفر اصلي موخه د چین ـ پاکستان اقتصادي دهلېز د دویم پړاو عملي کول دي.
د پاکستان د بهرنیو چارو وزیر اسحاق ډار پر خپلې اېکس پاڼې لیکلي، ټاکل شوې ده چې شهباز شریف به لومړی په هانګژو ښار کې د ژیجیانګ ایالت له چارواکو سره وګوري او د سيپیک د دویم پړاو په تړاو د سوداګرۍ په جوړ شوي فورم کې ګډون وکړي. نوموړي زیاته کړې، چې شریف به په دغه سفر کې د نړیوال سوداګریز شرکت «علي بابا» له مرکزي دفتر څخه د لیدنې ترڅنګ د دوه اړخیزو همکاریو څو مهم هوکړهلیکونه هم لاسلیک کړي.
ټاکل شوې، چې د پاکستان لومړی وزیر به له هانګژو ښار څخه وروسته د چین پلازمېنې بېجینګ ته سفر وکړي. نوموړی به په بېجینګ کې د چین له ولسمشر شي جینپینګ او لومړي وزیر لي چیانګ سره جلا جلا رسمي لیدنې او خبرې اترې ولري او د دې ترڅنګ شهباز شریف به د پاکستان او چین د ډیپلوماټیکو اړیکو د ۷۵مې کلیزې په مناسبت په جوړه شوې ځانګړې غونډه کې هم ګډون وکړي.
د پاکستاني چارواکو په وینا، چین ته د شهباز شریف دا سفر به د دواړو هېوادونو ترمنځ اړیکو ته نوې بڼه ورکړي او په ځانګړې توګه به د سيپیک پروژې د دویم پړاو په چوکاټ کې د پاکستاني او چینایي شرکتونو ترمنځ همکارۍ لا پسې پراخې کړي.
