اکسیوس: ځینې سیمه ییز مشران د هوکړې غوښتونکي دي خو ټرمپ پرېکړه نه ده کړې
اکسیوس د یوې باخبره سرچینې له قوله راپور ورکړی، چې د امریکا ولسمشر ډونالډ ټرمپ د شنبې په ورځ د سعودي عربستان، متحده عرب امارات، قطر، مصر، ترکیې او پاکستان له مشرانو سره ټلیفوني اړیکې نیولي دي ترڅو د ايران سره د احتمالي هوکړې په اړه خبرې وکړي.
اکسيوس ته دغه باخبره سرچینې ویلي، چې دغو مشرانو له ټرمپ څخه وغوښتل چې دا هوکړه ومني.
په راپور کې ويل شوي، د ټرمپ اداره او د ايران اسلامي جمهوریت د جګړې د پای ته رسولو لپاره هوکړې ته نږدې شوي دي او د یو امریکايي چارواکي په وینا، پاتې اختلافونه د څو مواردو پر «څرګندولو» متمرکز دي.
دغه چارواکي ټینګار کړی چې ټرمپ د دې هوکړې په اړه تر اوسه کومه وروستۍ پرېکړه نه ده کړې.
د اکسیوس په راپور کې ويل شوي چې ټرمپ او د هغه سلاکارانو د دغه جګړې په پخوانیو پړاوونو کې څو ځله فکر کاوه چې توافق ته نږدې شوي دي، خو له هغو خبرو اترو څخه هیڅ یوه پایله ترلاسه نشوه.
