د طالبانو د روغتیا وزارت وايي چې د فراه ولایتي روغتون کې په یوه کال کې له ۳۵۰۰څخه زیات جراحي عملیات ترسره شوي، خو د دولتي روغتونونو د جراحي عملیاتو لوړې شمېرې د روغتیايي خدماتو او د غیرضروري عملیاتو د احتمال په اړه اندېښنې راپورته کړې دي.
طالبانو ویلي چې په تېر کال کې د فراه ولایتي روغتون کې ټولټال ۳۵۵۳ جراحي عملیات په بریالیتوب سره ترسره شوي دي، چې له دې ډلې ۱۸۸۲ لوی او ۱۶۷۱ واړه عملیات دي.
طالبان دا یوه لاسته راوړنه ګڼي او وایي چې دا د دې روغتون د تخنیکي او تخصصي ظرفیت ښکارندویي کوي.
خو سرچینو افغانستان انټرنشنل-پښتو ته ویلي چې په ځینو مواردو کې، په ځانګړي ډول د ښځو د ولادي قضیو په برخه کې، د دولتي روغتونونو ټول عملیاتونه روښانه طبي اړتیا نه لري او احتمال شته چې ځینې قضیې د دونرانو د مالي ملاتړ یا مالي هڅونو له امله عملیاتو ته واړول شي.
د دغو سرچینو په وینا، په ځینو حالاتو کې، په ځانګړي ډول د زېږون اړوند ستونزو کې، ښځې تر ډېره عملیات کېږي، په داسې حال کې چې ځینې نور ناروغان چې ورته ستونزې لري د واسطې لرلو له امله له عملیاتو معاف کېږي.
ماهره (مستعار نوم) وایي چې څه موده وړاندې له یوې ولادي ناروغې سره یو دولتي روغتون ته تللې وه. د هغې په وینا، ډېری ولادي ناروغان عملیات کېدل. هغه وایي: «پخوا به داسې نه وه، حتی ښځو به په کورونو کې زېږون کاوه او د عملیاتو شمېر به بیخي کم و، اوس ډېری ښځې د ماشوم د زېږون پر مهال عملیات کېږي.»
دا په داسې حال کې ده چې د افغانستان روغتیايي نظام د تجهیزاتو، امکاناتو او تخصصي خدماتو له کمښت سره مخ دی، چې همدې موضوع د روغتیايي خدماتو د کیفیت او عدالت په اړه اندېښنې زیاتې کړې دي.
