د سارک هېوادونو سازمان د سوداګرۍ او صنایعو خونې پخواني مشر افتخار علي ملک ویلي، پاکستان او افغانستان د خپل ستراتېژیک جغرافیایي موقعیت له امله د مرکزي اسیا، سویلي او ختیځې اسیا د انرژۍ د بازارونو ترمنځ یو طبیعي پل جوړولای شي.
د پاکستان د دولتي خبري اژانس (اې پي پي) د خبر له مخې، افتخار ملک په يو بيان کې ویلي، چې پاکستان ځانګړی جیوپولیټیک، سوداګریز او ستراتیژیک اهمیت لري او کولای شي د سیمې په بدلولو کې له یوې جګړه ځپلې سیمې څخه په یو لوی سوداګریز او ترانزیتي دهلیز کې مرسته وکړي.
همداراز هغه ټینګار کړی، چې د دې لیدلوري لاسته راوړل په افغانستان کې سیاسي ثبات او مسؤلانه حکومتولۍ ته اړتیا لري. هغه یادونه وکړه، افغانستان چې په وچه کې ایسار هېواد دی، د اوږدمهاله اقتصادي ثبات لپاره له ګاونډیو هېوادونو سره د باور وړ ترانزیتي ملګرتیاوو ته اړتیا لري. هغه وویل، پاکستان د ترهګرۍ او پولې پورې غاړې د وسله والو فعالیتونو له امله د امنیتي ننګونو سره سره په دوامداره توګه د سیمهییزې همکارۍ ملاتړ کړی دی.
افتخار ملک د قزاقستان، ازبکستان، ترکمنستان، تاجکستان او کرغزستان په ګډون د مرکزي اسیا د هېوادونو پراخو طبیعي سرچینو ته په اشارې وویل، پاکستان او افغانستان د دغو سرچینو د نړیوالو او سیمهییزو بازارونو سره د نښلولو لپاره تر ټولو لنډه ځمکنی لار برابروي.
هغه زیاته کړه، اقتصادي فرصتونو د پرانیستلو لپاره تلپاتې سوله او سیمهییزه همکاري اړینه ده. او د ترهګرۍ، د وسله والو د پټنځایونو او د پولې پورې غاړې د بریدونو له منځه وړلو پرته دوامداره سوداګري او اتصال بریالي کېدای نشي.
د سویلي اسیا د اته غړو هېوادونو د سیمهییزې همکارۍ سازمان سارک په ۱۹۸۵ کال کې جوړ شوی، چې په اړه یې ويل کیږي، دا سازمان له ۲۰۱۶کال راهیسې تر ډېره غیرفعاله پاتې شوی او ګټورې چارې یې نه دي ترسره کړې.
