د کډوالۍ نړیوال سازمان (اې او ایم) اعلان کړی چې د سوېډن هېواد په مالي ملاتړ به په افغانستان کې د راستنېدونکو کډوالو او زیانمنو ټولنو د ملاتړ لپاره یو نوی بشرپاله پروګرام پلي کړي.
دغه سازمان د یکشنبې په ورځ، د غبرګولي په ۳مه، په خپل راپور کې ویلي چې دا مرسته د دې لپاره ځانګړې شوې څو د راستنېدونکو د دوامدار ادغام، ټولنیز یووالي او د هغوی او کوربه ټولنو د اقتصادي وضعیت د ښه کېدو برخه کې مرسته وکړي.
د راپور له مخې، دا پروګرام په داسې وخت کې پلي کېږي چې افغانستان لا هم د اوږدو جګړو، طبیعي پېښو، کورني بېځایه کېدو او له ګاونډیو هېوادونو د کډوالو د پراخې راستنېدنې له اغېزو سره مخ دی.
د ملګرو ملتونو اړوند بنسټ ویلي،چې دا ۱۳میاشتنی پروګرام به په هغو سیمو کې عملي شي چې د راستنېدونکو شمېر پکې لوړ دی. د دې پروګرام موخه د ټولنیز مشارکت پیاوړتیا، د خلکو د پوهاوي زیاتوالی او د سیمهییزو نوښتونو ملاتړ بلل شوی دی.
د اقتصادي برخې په چوکاټ کې به د کارموندنې فرصتونو رامنځته کولو، مسلکي زدهکړو، د کوچنیو او منځنیو کاروبارونو ملاتړ او بازارونو ته د لاسرسي پیاوړتیا ته ځانګړې پاملرنه وشي.
د کډوالۍ نړیوال سازمان ټینګار کړی چې دغه اقدامات به د خلکو د معیشت په ښه کېدو، د زیانمننې په کمېدو او د ناقانونه کډوالۍ د مخنیوي په برخه کې مهم رول ولوبوي.
