کوټه کې د اورګاډي چاودنې ورستي جزیات؛ ۲۲ کسان وژل شوي او له ۷۰ زیات ټپیان دي
د پاکستان د بلوچستان ایالت په مرکزي ښار کوټه کې د چمن پاټک په سیمه کې د جعفر ایکسپریس پر اورګاډي زوروره چاودنه شوې، چې له امله یې د روغتیايي او پولیسو سرچینو په وینا ۲۲ کسان وژل شوي او له ۷۰ زیات نور ټپیان شوي دي.
د لومړنیو معلوماتو له مخې، چاودنه هغه مهال رامنځته شوې چې له کوټې څخه پېښور ته روان جعفر ایکسپریس اورګاډی د چمن پاټک له سیمې تېرېده.
د روغتون سرچینې وایي چې د پېښې له ځایه تر اوسه د ۲۲ کسانو مړي روغتون ته لېږدول شوي، په داسې حال کې چې د پولیسو سرچینې د ټپیانو شمېر له ۷۰څخه زیات ښيي.
چاودنې له امله د اورګاډي دوه ډبې له پټلۍ وتلي او یوه ډبه سخته زیانمنه شوې ده. د پېښې وروسته د ژغورنې ډلې، امبولانسونه او امنیتي ځواکونه سیمې ته رسېدلي او عملیات روان دي.
چارواکي وایي د پېښې په اړه پلټنې روانې دي او د چاودنې د نوعیت د معلومولو هڅې دوام لري.
تر اوسه کومې وسله والې ډلې ددغه چاودنې مسولیت په غاړه ندی اخیستی.
