د پاکستان د بشري حقونو کمېسیون: حکومت په بلوچستان کې د امنیت په ټینګښت کې پاتې راغلی
د پاکستان د بشري حقونو کمېسيون (اېچ ار سي پي) په بلوچستان ایالت کې پر زياتېدونکې ناامنۍ ژوره اندېښنه څرګنده کړې او ویلي یې دي چې«په دغه ايالت کې د ناامنۍ زياتېدونکې پېښې د حکومتي واک د کمزورۍ ښکارندويي کوي».
دغه کمېسیون په یوه اعلامیه کې، د يکشنبې په ورځ په کویټه کې په اورګاډي د شوې چاودنې وروسته وويل، «په دغه برید کې چې د ښځو او ماشومانو په ګډون په کې ګڼو کسانو ته مرګ ژوبله اوښټې، دا په دې ولایت کې پر ملکي وګړو د بریدونو د زیاتېدو نښه ده».
د بشري حقونو کمېسيون وويل، بلې خوا ته د اندېښنې وړ هغه راپورونه دي چې د چاغي اړوند ریکو ډیک او زیارت سیمو کې په تېره اونۍ کې وسلهوالو ډلو لږ تر لږه ۲۱ ملکي وګړي، په شمول د یوه پولیس افسر، تښتولي او موټرې یې په بېپروا ډول سوځولي دي.
اېچ ار سي پي په بلوچستان کې د ناامنۍ د تازه رامنځته شوو پېښو په ترڅ کې وویل، دا تازه پېښې د می په میاشت کې په نوشکي او قلات کې له ورته بریدونو وروسته رامنځته کېږي چې په کې ۵ کارګران او ۵ پولیس د وسلهوالو کسانو لخوا تښتول شوي وو.
د بشري حقونو کمیسیون ټینګار کړي چې،«د جګړې او ناامنۍ په وضعيت کې د ملکي وګړو او غیر جنګیالیو د یوې وسیلې په توګه کارول د منلو وړ نه دي».
کمېسيون په مرکزي او د بلوچستان پر ايالتي حکومتونو غږ کړي، «چې د ملکي وګړو خوندیتوب ته لومړیتوب ورکړي او د ټولو لورو لخوا د بشري حقونو د سرغړونو د حساب ورکولو ډاډ ترلاسه کړي».
