کوټه کې پر اورګاډي چاودنه؛ تر دې مهاله شپږ کسان وژل شوي او ۴۰ نور ټپیان دي
د پاکستان د بلوچستان ایالت په مرکز کوټه ښار کې د چمن پاټک ته نږدې د مسافرو پر ډک اورګاډي زوروره چاودنه شوې، چې له امله یې د امنیتي سرچینو په وینا شپږ کسان وژل شوي او ۴۰ نور ټپیان شوي دي. ځينې سرچینو ویلي چې مرګ ژوبله تر دې ډېره ده.
د لومړنیو معلوماتو له مخې، چاودنه هغه مهال رامنځته شوې چې اورګاډی د چاوڼۍ له سیمې څخه د ښار پر لور روان و او د چمن پاټک نږدې سیمې ته رسېدلی و.
امنیتي سرچینې وایي، د چاودنې له امله د اورګاډي دوه ډبې له پټلۍ وتلي او یوه ډبه سخته زیانمنه شوې ده. د پېښې ځای ته د ژغورنې ډلې، امبولانسونه او د ملبې د لرې کولو لپاره کرېنونه لېږل شوي او عملیات روان دي.
د بلوچستان د کورنیو چارو ځانګړي سلاکار بابر یوسفزي ویلي، چې د پېښې په اړه بشپړ معلومات راټولېږي او تر وروستیو څېړنو وروسته به نور جزیات له رسنیو سره شریک کړل شي.
نوموړي زیاته کړې چې ټولو اړوند ادارو ته خبردارې ورکړل شوی چې د احتمالي وضعیت د کنټرول لپاره چمتو وي.
بل لور ته، د کوټې په روغتونونو کې بېړنی حالت اعلان شوی او د ټپیانو د درملنې لپاره اضافي طبي ډلې رابلل شوې دي.
چارواکو له خلکو غوښتي چې د پېښې له ځایه لرې پاتې شي او د ګڼهګوڼې له جوړولو ډډه وکړي، څو د ژغورنې عملیات په اسانۍ سره پر مخ ولاړ شي.
