د رارسېدلو اسنادو له مخې، طالبانو د کار او ټولنیزو چارو وزارت ۸۲ کارکوونکي له دندو ګوښه کړي دي. د یاد وزارت یو شمېر کارکوونکو افغانستان انټرنشنل ته ویلي چې طالبانو تیره اونۍ له مخکینۍ خبرتیا پرته ګوښه کړي دي.
د هغو کارکوونکو له ډلې څخه چې د طالبانو د دې اقدام له امله یې خپلې دندې له لاسه ورکړې، یوه کس افغانستان انټرنشنل ته ویلي چې دی د طالبانو له واکمنۍ مخکې د ازادې سیالۍ له لارې ګومارل شوی و او له لسو کلونو زیات یې په دغه وزارت کې دنده کړې ده.
هغه د کار او ټولنیزو چارو وزارت کې د طالبانو چارواکي تورن کړل چې د خپلو نږدې کسانو د راوستلو لپاره یې کارکوونکي له دندو ګوښه کړي دي.
هغه وویل، چې ډیری هغه کسان چې له دندې ګوښه شوي دي د تېر حکومت کارکوونکي دي.
د طالبانو د کار او ټولنیزو چارو وزیر عبدالمنان عمري د طالبانو د مشر او بنسټ اېښودونکي ورور دی.
د طالبانو د کار او ټولنیزو چارو وزارت د ګومارنو اعلان کړی او ویلي یې دي چې د وړ او متخصصو کسانو د ګومارنې لپاره یې ۸۲ پوستونه اعلان کړي دي.
په دغو پوستونو کې له پخوا ګومارل شوي کسان وايي چې ډیری یې په دې برخو کې تجربه او تخصص لري او دا د پخوانیو حکومتي کارکوونکو د یوې ډلې د ګوښه کولو لپاره یوه پلمه ده.
واک ته له راستنیدو راهیسې، طالبانو په ګڼو دولتي څانګو کې مسلکي کارکوونکي لرې کړي دي او د هغوی پر ځای یې ملایان ګومارلي دي.
