د طالبانو تر واک لاندې اریانا افغان هوايي شرکت وايي، چې د مساپرو غوښتنو ته په کتو یې د کابل او ډیلي ترمنځ ورځنۍ دوه طرفه الوتنې پیل کړې دي. له دې وړاندې هره اونۍ د کابل او ډیلي ترمنځ څلور الوتنې کېدې.
اریانا افغان هوايي شرکت د یکشنبې په ورځ، د غبرګولي ۳مه وویل، چې له دې وروسته به د کابل او ډیلي ترمنځ هره ورځ دوه طرفه الوتنې کېږي.
یاد هوايي شرکت ویلي، چې د کابل ـ ډیلي ترمنځ د ورځنیو الوتنو پیل به د سوداګرۍ، درملنې، زدهکړو او کورنیو سفرونو لپاره د خلکو تګ راتګ لا اسانه او چټک کړي.
د طالبانو تر واک لاندې اریانا افغان هوايي شرکت پر داسې مهال د کابل او ډیلي ترمنځ د الوتنو د ډېرېدو خبر ورکړی، چې په دې وروستیو کې د طالبانو او هند ترمنځ اړیکې پراخې شوې دي.
