په کندهار کې سیمهییزو سرچینو افغانستان انټرنشنل ته ویلي، چې د طالبانو د اطلاعاتو او کلتور ریاست او استخباراتو په کندهار کې درې سیمهییزې راډیوګانې وتړلې. دغه راډیوګانې تحسین القران، څانګه او زما زېور یادې شوې دي.
په کندهار کې د طالبانو د اطلاعاتو او کلتور ریاست د یکشنبې په ورځ، د غبرګولي ۳مه د یوې خبرپاڼې په خپرولو سره ویلي، چې په دغه ولایت کې یې د تحسین القران، څانګې او زما زېور په نومونو درې سیمهییزې راډیوګانې د رسمي جوازونو نه لرلو، د مالیاتو د نه ورکړي او غیرمعیاري خپرونو لهامله وتړلې.
طالبانو ویلي، چې په کندهار کې یې نورو ټولو سیمهییزو راډیوګانو ته سپارښتنه کړې، چې له «اسلامي اصولو سره سم دې خپل نشرات تنظیم کړي».
په ورته مهال بیا د سیمهییزو راډیوګانو کارکوونکي وايي، چې د نشراتو لپاره د جوازونو په نوي کولو او مالیاتو برخه کې د طالبانو د استخباراتو ریاست او د علماوو شورا خنډونه جوړوي.
په کندهار کې دمګړی ۱۵ سیمهییزې راډیوګانې فعالیت کوي، چې له دې ډلې یې د دریو راډیوګانو پر خپرونو طالبانو تازه بندیزو ولګاوه.
