بلوچستان کې د امنیتي ځواکونو په عملیات کې نهه وسلوال او څلور امنتي سرتېري وژل شوي
د پاکستان د بلوچستان ایالت د کوټې اړوند په کچلاک او نوحصار سیمو کې د ترهګرۍ ضد ځواکونو او وسلوالو ترمنځ په نښته کې نهه شکمن وسلوال او څلور امنیتي سرتېري وژل شوي دي.
چارواکو ویلي، دا عملیات د استخباراتي معلوماتو پر بنسټ د ترهګرۍ ضد څانګې او نورو امنیتي ځواکونو له خوا ترسره شول، چې پکې د وسلوالو پټنځایونه په نښه شوي.
د بلوچستان د ایالتي حکومت ویاند شاهد رند ویلي، عملیات په بریالیتوب ترسره شوي او امنیتي ځواکونو د وسلوالو پر ضد “مسلکي او چټک” اقدام کړی دی.
د نوموړي په وینا، د عملیاتو پر مهال وسلوالو سخت مقاومت وکړ، چې له امله یې درنه نښته رامنځته شوه او څلور امنیتي سرتېري پکې ووژل شول، د نوموړي په وینا، په دغه نښته کې د وژل شویو ترڅنګ ټپیان هم شته.
هغه ټینګار کړی چې د بلوچستان حکومت به د وسلوالو پر ضد عملیاتو ته دوام ورکړي او هیچا ته به اجازه ور نه کړي چې د ایالت امنیت ګډوډ کړي.
تر اوسه کومې وسله والې ډلې ددغه خبر په تړاو رسنیو ته څه ندي ویلي.
په وروستیو کلونو کې بلوچستان د ناامنۍ او وسلهوالو بریدونو له زیاتوالي سره مخ شوی او امنیتي ځواکونه وخت ناوخت د وسلوالو پر ضد عملیات ترسره کوي.
