امنیتي چارواکي وایي، د خېبر پښتونخوا د بنو ولسوالۍ د میریان سیمې په بارکزي اخوندخېل کې د شنبې په ورځ د پولیسو، ولسي امن کمېټې او وسلوالو ترمنځ سخته نښته شوې، چې پکې لږ تر لږه ۲۵ وسلوال وژل شوي او ګڼ نور ټپیان دي.
د سیمې د پولیسو مشر یاسر افریدي رسنیو ته ویلي، د عملیاتو پر مهال دوه پولیس او دوه ولسي وګړي هم وژل شوي او اووه پولیس او درې ولسي کسان ټپیان شوي دي.
د سرچینو په وینا، ولسي امن کمېټې ته د ګڼ شمېر وسلوالو د شتون خبر رسېدلی و، چې له هغې وروسته یې له پولیسو سره ګډ عملیات پیل کړل. د لکي مروت ولسي امن کمېټې هم د بنو پولیسو ملاتړ ته ځواکونه استولي وو.
راپورونه وایي، وسلوالو د سیمې پر لارو خنډونه جوړ کړي وو، خو پولیسو د پرمختګ پر مهال دغه خنډونه لرې کړل او خپلې موخې ته ورسېدل.
سرچینې وایي، لا هم په مرکزي سیمه کې یو شمېر وسلوال موجود دي او د دواړو خواوو ترمنځ وخت ناوخت ډزې دوام لري.
چارواکي وایي، په دغه وسله واله نښته کې څو ټپیان شوي پولیس او ولسي وګړي روغتونونو ته لېږدول شوي دي.
