د پښتونخوا په ټانک ولسوالۍ کې ښوونځی او روغتيايي مرکز په چاودېدونکو توکو الوزول شوي
د خيبرپښتونخوا په سويلي ولسوالۍ ټانک کې نامعلومو کسانو يو دولتي ښوونځی او يو روغتيايي مرکز پر چاودېدونکو توکو الوزولي دي.
د پاکستان ډان ورځپاڼې له سیمه ییزو سرچینو له قوله خبر ورکړی، چې دغه پېښه د ټانک ولسوالۍ په چیسان کیچ سیمه کې رامنځه شوې ده.
بريد کې د هلکانو دولتي ښوونځی او ورسره څنګ ته روغتيايي مرکز په نښه کړل شوي دي.
د خبر له مخې، سیمه ییزو سرچینو تایید کړې چې په دې پېښه کې چا ته مرګ ژوبله نه ده اوښتې ځکه چې د چاودنو پر مهال ودانۍ خالي وې. ويل شوي، پوليسو د پېښې په اړه یې پلټنې پیل کړې دي.
په ټولنيزو رسنیو هم د يادو ودانيو ويډيوګانې او انځورونه خپاره کړل شوي چې په نړېدلې حالت کې دي.
له دې وړاندې هم په تېرو څو مياشتو کې په بنو، سويلي او شمالي وزيرستان کې دولتي ښوونځي او پلونه په چاودېدونکو توکو الوزول شوي دي.
