د نړۍ له بېلابېلو هېوادونو تر ۱.۵ مېليونه ډېر حاجیان نن دوشنبه (د غبرګولي ۴مه) د مکې مکرمې په ښار کې د حج مراسم پيل کړل. حاجیان نن پلي او په موټرو کې د لارو، تونلونو او پلونو له لارې منا ته ورسېدل او سبا به د حج د ستر رکن د عرفاتو مراسم ترسره کړي.
حاجیان د ذی الحجې اتمه ورځ په منا کې تېروي، منا د مکې او مزدلفې ترمنځ له مسجد الحرام نه ۷ کيلومتره واټن لري. له بل پلوه د سعودي عربستان د هواپوهنې ادارې سر له نننه د ګرمې څپې د پیل خبر ورکړی. د یادې ادارې د وړاندوینې له مخې؛ نن به د تودوخې درجه ۴۷ ته لوړه شي.
ورته مهال د طالبانو د ارشاد، حج او اوقافو وزارت وایي، چې سږکال ټول ٣٠زره افغان حاجیان د اریانا افغان او کام ایر هوايي شرکتونو په ٩٧ الوتنو کې سعودي عربستان ته لېږدول شوي دي.
د یاد وزارت په وینا؛ په لومړي پړاو کې نږدې ١٥زره حاجیان مدینې منورې او په دويم پړاو کې تر ١٥زره ډېر مکې ته لېږدول شوي چې دا مهال ټول په مکه معظمه کې حضور لري.
خو وړاندې یوشمېر افغان حاجیانو چې د حج فریضې ادا کولو لپاره سعودي عربستان ته تللي په یوې خپرې شوې ویډیو کې ویلي و، چې د اسانتیاوو له نشتوالي سره مخ دي او کمزوري خدمتونه ورته وړاندې کېږي. د هغوی په وینا؛ سره له دې چې طالبانو ترې لوړ لګښتونه اخیستي؛ خو لازم خدمات ورته نهدي برابر شوي.
