طالبانو الله ګل مجاهد د خپل زوی په جنازه کې له ګډون وروسته بېرته زندان ته لېږدولی

د طالبانو د کندهار والي ملا شیرین اخند د پنجشنبې په ورځ د دغه ولایت د ۱۲ ولسوالیو له ولسوالانو سره په کتنه کې د امنیت پر ټینګښت او د شریعت پر تطبیق ټینګار کړی دی.

په کندهار کې د طالبانو د والي ددفتر په وینا، په دې لیدنه کې د حکومتولۍ پر بېلابېلو برخو او د مسوولیتونو پر ترسره کولو خبرې شوې دي.

د طالبانو د کندهار والي ولسوالانو ته ویلي، چې د طالبانو د مشر هبت‌الله اخوندزاده د پرېکړې له مخې دغه ولایت او اړوندو ولسوالیو ته کافي امنیتي تشکیل ورکړل شوی دی.

نوموړي خبرداری ورکړی چې امنیتي ځواکونه معاشونه او پر وخت اکمالات لري، نو ځکه د امنیت د ټینګښت په برخه کې هېڅ ډول عذر د منلو وړ نه دی.

ملا شیرین اخوند د طالبانو د پوهنې مسوولینو او ولسوالانو ته سپارښتنه کړې چې په ښوونځیو او مدرسو کې د نوي نسل روزنې او د هغوی «د عقیدې سمون» ته ځانګړې پاملرنه وکړي او له بې‌وزلو کسانو سره مرستې وکړي.

د طالبانو والي دغه راز له خپلو سیمه‌ییزو چارواکو غوښتي چې د محاکمو د پرېکړو په پلي کولو او د نشه‌یي توکو د کښت، قاچاق او پېر او پلور په مخنیوي کې جدي ګامونه پورته کړي.

په دې غونډه کې د ډنډ، دامان، تخته‌پُل، پنجوايي، ارغنداب، میوند، شاه‌ولیکوټ، ژیړۍ او خاکرېز ولسوالیو ولسوالانو ګډون کړی دی.

دایرنا اژانس د راپور له مخې د تایباد ولسوال حسین جمشېدي د نشه یي توکو د مخنیوي د روزنیزې غونډې پر مهال ویلي، چې یاده ولسوالۍ یوازې ۱۸ کیلومټره د افغانستان د پولې له صفري نقطې سره موقعیت لري، نو له همدې امله یې حساسیت ډېر لوړ دی.

نوموړي زیاته کړې چې ایران له نشه یي توکو سره د مبارزې په برخه کې تر اوسه له ۲۴۰۰ څخه زیات مړه او ۳۰۰۰ ټپیان ورکړي دي.

هغه ویلي چې د دوغارون رسمي بندر له ۱۰۷ کلونو راهیسې فعال دی او اړتیا ده چې د دواړو خواوو د موټرو تګ راتګ لا دقیق کنټرول شي.

ایراني چارواکي ټینګار کوي چې باید د ایران د ټولو ملي، ولایتي او محلي امکاناتو په کارولو سره د سرحد له لارې دنشه یې توکو د قاچاق مخه ونیول شي او اړین جوړښتونه رامنځته شي.

د تایباد د څارنوالۍ چارواکو ویلي چې په دې سیمه کې د ټولنیزو ستونزو لکه غلا، طلاق او د ماشومانو کار لوی لامل اعتیاد دی.

د طالبانو د زندانونو چارو د تنظیم ادارې نن دوشنبه، د غبرګولي پر ۴مه خبر ورکړی، چې د لوی اختر په مناسبت یې د کابل، بلخ او غزني ولایتونو له زندانونو څخه ۲۴۹ تنه بندیان خوشې کړي دي.

د ورکړل شویو معلوماتو له مخې، په خوشې شویو کسانو کې ۱۲۴ تنه د کابل له څرخي پله مرکزي زندان او ۱۲۵ تنه نور د بلخ او غزني ولایتونو له زندانونو خوشې شوي دي.

د دغو زندانیانو د خوشې کېدو لپاره په کابل کې ځانګړي مراسم هم جوړ شوي وو.

په کابل کې د بندیانو د خوشې کېدو په مراسمو کې د طالبانو د زندانونو چارو د تنظیم ادارې نظامي مرستیال محمد کاظم طارق ویلي، چې د دوی تر واک لاندې زندانونه اوس په «مدرسو او اصلاح ځایونو» بدل شوي دي.

طارق له ازادو شویو کسانو وغوښتل چې په زندان کې له ترلاسه کړو دیني او حرفوي زده کړو ګټه واخلي او د جرمونو له تکرار څخه ډډه وکړي.

طالبان د تېرو حکومتونو په څېر په ځانګړو ورځو کې زندانیان خوشې کوي او یا یې هم د بند مودې کموي.

د بلخ د درملو اتحادیې مسوول محمد صادق محمدي ویلي، چې له ازبکستان څخه د درملو واردات افغان سوداګرو ته په وړ بیه تمامېږي او دا درمل به د هېواد شاوخوا ۲۵ سلنه اړتیا پوره کړي.

بلخوا د بلخ د سوداګرۍ خونې مشر سید اکرم سادات ویلي، چې دغه درمل د هند، پاکستان، بنګله دېش او چین د درملو په پرتله باکیفیته دي او بیې یې هم مناسبې دي، ځکه د حیرتان بندر له لارې په لنډه لار واردېږي.

په ورته وخت کې اقتصادي کارپوهان هم د ازبکستان درمل باکیفیته او په مناسب قیمت بولي او وایي چې په کور دننه د درملو تولید ترڅنګ د منځنۍ اسیا هېوادونو څخه واردات د پاکستان په پرتله غوره بدیل دی.

د افغانستان د لوژستیکي شرکتونو مسوولان او سوداګر وایي، چې د پاکستان د لارو تړل کېدو او د هرمز تنګي د شخړو له امله د باروړونکو کانټینرونو کرایې له درې زرو ډالرو څخه ۷ زرو او حتا ۱۱ زرو ډالرو ته رسېدلې دي.

د سوداګرو په وینا، له چین څخه افغانستان ته د توکو د لېږد لګښت له ۱۵ زرو ډالرو اوښتی، خو پخوا دغه لګښت شاوخوا ۱۵۰۰ ډالره و.

د طالبانو د روغتیا وزارت سرچینو ویلي، چې اوس مهال په افغانستان کې د درملو ۱۳۰ کارخونې فعالیت لري، چې شاوخوا ۱۵۰۰ ډوله درمل تولیدوي او د هېواد نږدې ۳۷ سلنه اړتیاوې پوره کوي، خو له دې سره سره لاهم له پاکستان نه هره ورځ دمل قاچاق کیږي او یوازې په تېرو دوو اونیو کې له ۲۲ زرو کیلوګرامو ډېر قاچاقي درمل نیول شوي دي.

د بلخ ولایت لپاره د طالبانو د والي دفتر نن دوشنبه ویلي، چې د ازبکستان د ۳۲۰ ټنه بشري مرستو جوپه په حیرتان بندر کې د دې ډلې سیمه‌ییزو چارواکو ته سپارل شوې ده

دا مرستې د دوشنبې په ورځ د لوی اختر په مناسبت افغانستان ته رالېږل شوې دي.

د طالبانو د معلوماتو له مخې، په دې جوپه کې ۹۶ ټنه اوړه، ۲۲ ټنه وریژې، لس زره قوطي د غویي حلاله غوښه، ۱۵ زره لیټره د لمرګل غوړي او ۲۲ ټنه مکروني شامل دي.

همدارنګه په دې مرستو کې ۴۱ زره او ۲۲۰ پاکټه بېلابېل ډوله بېسکټ، درې ټنه د کیلې خوند بېسکټ، ۲۲ ټنه بوره او ۲۲ ټنه نخود هم شامل دي.

د دې مرستو د تسلیمولو په مراسمو کې د بلخ ولایت لپاره د طالبانو مرستیال والي نورالهادي ابوادریس او په بلخ کې د طالبانو د بهرنیو چارو وزارت د استازولۍ مرستیال ګډون کړی و.

د ازبکستان له لوري په دغو مراسمو کې د افغانستان لپاره د دغه هېواد د ولسمشر ځانګړي استازي عصمت‌الله ایرګشوف او د سرخان‌دریا ولایت والي ګډون درلود.

طالبانو دا نه دي ویلي، چې دا بشري مرستې به پر چا وېشي خو نیوکې دا دي، چې دا ډول مرستې ډېری د خپلې ډلې پر غړو وېشي.