نیویارک پوسټ: ښایي مجتبی خامنهیي ته د هوکړې متن رسېدل څو ورځې وخت ونیسي
نیویارک پوسټ ورځپاڼې د امریکا حکومت د یوه لوړ پوړي چارواکي په حواله راپور ورکړی، چې د هرمز تنګي د بیا پرانیستلو لپاره د ایران له حکومت سره د سولې هوکړې وروستي کېدل ښایي تر یوې اونۍ وخت ونیسي.
د دغه راپور له مخې؛ که تهران د ډونالډ ټرمپ لهخوا ټاکل شویو شرایطو ته غاړه نهږدي، نو ښایي د امریکا ولسمشر له یادې هوکړې ووځي. دغه امریکايي چارواکي زیاته کړه، وروسته له هغه چې ټرمپ اعلان وکړ چې د جګړې او د ایران اټومي پروګرام په اړه خبرې اترې وروستي پړاو ته رسېدلې؛ د ایران حکومت هوکړې ته د رسېدو لړۍ سوکه کړې ده.
د هغه په وینا؛ ښایي د هوکړې وروستی متن د ایران مشر مجتبی خامنهیي ته د رسېدو لپاره څو ورځې وخت ونیسي. ځینو رسنیو بیا راپور ورکړی، چې خامنهیي په یوه ناروښانه ځای کې پټ دی او له هغه سره د ایراني چارواکو اړیکه خورا ستونزمنه شوې ده.
دغه امریکايي چارواکي ټینګار وکړ، چې د هرمز تنګي پرانیستل او د ایران د بندرونو د بندېدو لړۍ پای ته رسېدل به شاوخوا اووه ورځې وخت ونیسي او امریکا به یوازې هغه وخت بندیزونه لرې کړي چې ایران خپل غني شوي یورانیم دوی ته وسپاري.
