د ایران جګپوړی پلاوی له امریکا سره د سولې احتمالي هوکړې پر سر د خبرو لپاره قطر ته تللی
د ایران د پارلمان رییس او د بهرنیو چارو وزیر د قطر له لومړي وزیر سره د خبرو لپاره دوحې ته تللي، چې د تهران او امریکا ترمنځ احتمالي هوکړه و ارزوي. یو جګپوړي چارواکي ویلي چې په دې خبرو کې د هرمز تنګي د پرانېستل کېدو او د بډایه شویو یورانیمو په څېر مسایل شامل دي.
د رویټرز د راپور له مخې، د ایران لوړپوړو مرکچیانو او د بهرنیو چارو وزیر د دوشنبې په ورځ په دوحه کې د قطر له لومړي وزیر سره د یوې احتمالي هوکړې پر سر خبرې کړي، چې هدف یې له امریکا سره د درې میاشتنۍ جګړې پای ته رسول دي.
یو جګپوړي چارواکي ویلي چې په دې خبرو کې د هرمز تنګي د پرانېستل کېدو، د ایران د لوړو بډایه شویو یورانیمو او د کنګل مالي شتمنیو د ازادېدو موضوعات شامل دي.
د امریکا د بهرنیو چارو وزیر مارکو روبیو ویلي چې واشنګټن به ډیپلوماسۍ ته بشپړ فرصت ورکړي، خو که دا هڅې ناکامې شي نو د «بلې لارې» انتخاب به هم په پام کې ونیسي.
نوموړي ویلي چې د هرمز تنګي د پرانېستلو او د اټومي مسالې په اړه «جدي او لنډمهاله خبرې» شونې دي.
په ورته وخت کې د ایران د بهرنیو چارو وزارت ویاند اسماعیل بقايي ویلي چې که څه هم په ګڼو مسایلو کې پرمختګ شوی، خو دا په دې معنا نه ده چې دواړه لوري د هوکړې د لاسلیکولو په درشل کې دي.
