د طالبانو د کډوالو د دایمي مېشتېدنې او د ځمکو وېش کمېټې خبر ورکړی، پرون یې په ننګرهار، فاریاب، کندوز، هلمند او زابل ولایتونو کې ۱۰۴۸ راستنېدونکو کورنیو ته استوګنیزې نمرې وېشلې چې له دې سره د وېشل شویو استوګنیزو نمرو شمېر ۳۵زره او ۱۸۹ ته لوړ شو.
تر دې وړاندې د طالبانو د کور او ښار جوړولو وزیر مولوي نجیب الله حیات حقاني ویلي و، چې دغه لړۍ راستنو شویو کورنیو ته د دایمي مېشتېدو لپاره د مناسبو فرصتونو برابرېدو په موخه چټکه شوې ده.
د هغه په وینا؛ د استوګنیزو نمرو د وېش له پروګرام څخه موخه د راستنو شویو کورنیو بنسټیزو اړتیاوو پوره کول او د منظمې ښاري پراختیا برابرول دي.
له بل پلوه ملګري ملتونه وايي، چې له ۲۰۲۳کال راهیسې نږدې ۶ مېلیونه کډوال افغانستان ته ستانه شوي دي. د ملګرو ملتونو د اټکل له مخې؛ تمه کېږي چې د روان کال تر پایه به ۳ مېلیونه نور افغانان هم افغانستان ته ستانه شي.
سره له دې چې طالبانو افغانستان ته د بېرته ستنېدونکو کډوالو لپاره په ځینو ولایتونو کې د اوسېدو ځانګړي پنډغالي او ښارګوټي جوړ کړي؛ خو تازه ستانه شوي کډوال له بېکارۍ او د سرپناه له نشتوالي شکایت کوي او ځینې کسان هڅه کوي بېرته پر ناقانونه لارو له هېواده ووځي.
