د البیروني پوهنتون زدهکړیالان: له پنځو میاشتو راهیسې مو د بدل اعاشې پیسې نهدي ترلاسه کړي
د البیروني پوهنتون یوشمېر زدهکړیالانو افغانستان انټرنشنل ته په لېږلو پیغامونو کې ویلي، چې طالبانو له تېرو پنځو میاشتو راهیسې د «بدل اعاشې» پیسې نهدي ورکړي. د دوی په وینا؛ ډېری زدهکړیالان له سخت اقتصادي وضعیت سره مخ دي.
دوی زیاتوي، هغه زدهکړیالان چې له لرو پرتو ولایتونو او سیمو راځي او په دولتي لیلیه کې نه اوسېږي؛ اړ دي چې د همدې «بدل اعاشې» په پیسو له پوهنتون بهر د استوګنې ځای برابر کړي.
دغه زدهکړیالان وایي، چې د دوی د ورځني ژوند لګښتونه هم له همدې پیسو تامینېږي؛ خو تراوسه دغه پیسې نهدي ورکړل شوې. تر دې وړاندې د تخار پوهنتون یوشمېر زدهکړیالانو هم له ورته ستونزې شکایت کړی و.
هغوی ویلي وو، چې په تېرو شپږو میاشتو کې یې د «بدل اعاشې» پیسې نهدي ترلاسه کړې او له همدې امله د کور کرایې او د خوړو برابرولو په برخه کې له جدي ستونزو سره مخ دي.
ویل کېږي، د بدل اعاشې د ورکړې ځنډ د دې لامل شوی چې ځینې زدهکړیالان، په ځانګړي ډول د تخار او بدخشان ولایتونو زدهکړیالان خپلې زدهکړې پرېږدي او د ژوند د لګښتونو برابرولو لپاره یې د سرو زرو په کانونو کې سخت کار ته مخه کړې.
یوشمېر خلک وایي، چې طالبان د حکومتي بودجې له لارې د خدمتونو او اسانتیاوو په برابرولو کې پاتې راغلي دي.
