په سعودي عربستان کې د حج تر ټولو مهم رکن د عرفاتو مراسم نن سېشنبه (د غبرګولي ۵مه) ترسره کېږي. د نړۍ له بېلابېلو هېوادونو تر ۱.۵ مېليونه ډېر حاجیان به نن د عرفات په میدان کې د حج خطبه واوري.
له منا نه عرفات ته د حاجیانو تګ د سهار له لمانځه وروسته پیل شوی او لاهم دوام لري. د عرفات په میدان کې راټول شوي حاجیان به د لمر لوېدو سره سم د مزدلفې په لور حرکت وکړي او شپه به هلته تېره کړي؛ دا د حج مناسکو ادا کولو درېیم پړاو دی.
دغه حاجیان به سبا چهارشنبه چې د لوی اختر لومړۍ ورځ ده، منا ته ځي چې (یوم النحر) یا د قربانۍ مناسک ادا کړي، له هغه وروسته به حاجیان په جمرات کې شیطان وولي او له هغه ځایه مسجد الحرام ته ځي او د وداع طواف کوي، خپل سرونه خرېیي او له احرام نه ځانونه خلاصوي؛ له دې سره د حج مراسم پای ته رسېږي.
حاجیانو پرون د ذی الحجې اتمه ورځ په منا کې تېره کړه، منا د مکې او مزدلفې ترمنځ له مسجد الحرام نه ۷ کيلومتره واټن لري. له بل پلوه د سعودي عربستان د هواپوهنې ادارې د ګرمې څپې د پیل خبر هم ورکړی دی. د یادې ادارې د وړاندوینې له مخې؛ د تودوخې درجه به ۴۷ ته لوړه شي.
له افغانستان نه څومره حاجیان تللي؟
ورته مهال د طالبانو د ارشاد، حج او اوقافو وزارت وایي، چې سږکال ټول ٣٠زره افغان حاجیان د اریانا افغان او کام ایر هوايي شرکتونو په ٩٧ الوتنو کې سعودي عربستان ته لېږدول شوي دي.
د یاد وزارت په وینا؛ په لومړي پړاو کې نږدې ١٥زره حاجیان مدینې منورې او په دويم پړاو کې تر ١٥زره ډېر مکې ته لېږدول شوي دي.
خو وړاندې یوشمېر افغان حاجیانو چې د حج فریضې ادا کولو لپاره سعودي عربستان ته تللي په یوې خپرې شوې ویډیو کې ویلي و، چې د اسانتیاوو له نشتوالي سره مخ دي او کمزوري خدمتونه ورته وړاندې کېږي. د هغوی په وینا؛ سره له دې چې طالبانو ترې لوړ لګښتونه اخیستي؛ خو لازم خدمات ورته نهدي برابر شوي.
