د پښتونخوا پوليس: د لوی اختر په ورځو کې د امنیت لپاره ۵۰زره پولیس ګمارل شوي
د خيبرپښتونخوا د پوليسو مشر ويلي، چې د لوی اختر په ورځو کې یې په دغه ایالت کې د امنيت د ټينګښت لپاره کلک ګامونه پورته کړي او ۵۰زره د پولیسو افسران او سرتېري یې ګمارلي ترڅو د خلکو امنیت خوندي کړي.
د پوليسو مشر ذوالفقار حميد په يوه ويډیویي پیغام کې ويلي، په ايالت کې د ولس د خونديتوب او مهمو ځايونو د ساتلو لپاره کوټلی پلان جوړ کړل شوی دی.
هغه وويل، د اختر د لمونځو په ځايونو، جماتونو، تمځایونو، ګڼې ګوڼې او سېلګرۍ په ځایونو کې به زيات سرتيري ځای پر ځای وي.
هغه زياته کړې، نه يوازې د اختر په ورځ، بلکې د رخصتيانو په نورو ورځو کې به هم پوليس هر ځای موجود وي، د امنيت سره سره به د خلکو سره احتمالي مرستې هم کوي.
د پوليسو مشر زياته کړې، د ایالت اوسېدونکو ته د سوله ييز اختر باور ورکوي.
د پښتونخوا د پوليسو مشر دا اختر پر مهال د امنیت د ټينګ ساتلو لپاره د اضافي سرتېرو ځای پر ځای کولو دا بيان په داسې وخت کې ورکړی، چې په دغه ايالت کې په وروستيو کې د ناامنۍ او ترهګرۍ پېښو زور اخستی دی.
