مخکیني ولسمشر اشرف غني په خپل اختریز پیغام کې ویلي، چې د طالبانو په واکمنۍ کې افغانستان په بې ساري ډول منزوي شوی او ګاونډیان د ګواښ په توګه ورته ګوري. اشرف غني ویلي، چې له تېرو شپږو میاشتو راهیسې یې د خبرو مخه نیول شوې وه.
اشرف غني په خپل اختریز پیغام کې، چې د هغه د ټولنیزو رسنیو له اکاونټونو خپور شوی، ویلي، چې د عرفې او اختر په را رسېدو یې یوځل بیا د خبرو فرصت موندلی دی.
هغه پر افغانستان د پاکستان وروستیو بریدونو ته اشاره کړې او وايي، چې اسلام اباد دې افغانستان ته د اقبال لاهوري له نظره وګوري.
اقبال لاهوري افغانستان د اسیا زړه بللی، چې په نارامېدو سره یې ټوله اسیا نارامه کېدای شي.
اشرف غني په سیمه کې روان وضعیت بېساری بدلون بللی او ټینګار یې کړی، چې په دغسې وضعیت کې بېتفاوته پاتې کېدل په دې معنا دي چې د افغانانو پرځای به نور خلک پرېکړې کوي.
هغه په دې شرایطو کې د سیمهییزې همکارۍ اړتیا تر پخوا ډېره اړینه ګڼلې او وايي،اقتصاد محوره سیاست د افغانانو د ټولو ملي ظرفیتونو همغږي غواړي.
اشرف غني د طالبانو واکمنۍ ته په اشاره ویلي، « نړۍ نږدې پنځه کاله انتظار وکړ چې وویني په افغانستان کې څه بدلون راځي، خو دا له نا امیدۍ سره مل انتظار د پای ته رسېدو په حال کې دی».
هغه زیاته کړې، « زموږ هېواد بېسارې توګه منزوي شوی او نږدې ټول لوري افغانستان نور د یو ګاونډي په توګه نه، بلکې د امنیتي ګواښ په سترګه ویني». هغه پاکستان ته هم اشاره کړې، چې پخوا یې د طالبانو ملاتړ کاوه، خو اوس په ښکاره وايي چې د افغانستان له خاورې د ترهګرۍ له ګواښ سره مخ دي.
مخکیني ولسمشر دا د مشروعیت د بحران پایله بللې، چې دده په وینا، ده یې په اړه له وړاندې خبرداری ور کړی و.
هغه د طالبانو له نوم یادونې پرته ویلي، هغه کسان چې د خپل ملت له نبضه خبر نه وي، هېڅکله د ملت ریښتینی استازي کېدای نه شي.
په داسې حال کې، چې طالبانو لا هم د نجونو پرمخ ښوونځي او پوهنتونونه بند ساتلي، اشرف غني دا مساله د طالبانو د فرعي مسالې د تعریف برعکس اصلي مساله ګڼي او ټینګار کوي، چې «هېڅ ملت په یوه پښه مزل نه شي کولای».
مخکیني ولسمشر د ملي ګټو په اړه ویلي، چې دغه ګټې باید د یوې ملي ارادې پر بنسټ تعریف شي او تل باید د ملت د یووالي په خدمت کې وي.
هغه زیاته کړې، « د یوې شبکې ګټې یا د یوې تړلې کړۍ شخصي لاسته راوړنې د ملت له ګټو سره په مستقیم تضاد کې دي».
هغه ددغه تضاد پر له منځه وړو ټینګار کړی دی.
اشرف غني د خپل پیغام په بله برخه کې د طالبانو پنځه کلنه دوره تر پوښتنې لاندې راوستې او ویلي یې دي، چې د انتخاب په اړه د خبرو وخت تېر شوی دی او اوس د انتخاب وخت دی او ملت باید د خپل راتلونکي لاره وټاکي. خو له دې ټولو سره سره هغه د جګړې مخالفت کړی او وايي، « هېڅ هدف او هېڅ نارضایتي د دې توجیه نه شي کېدای چې افغان د افغان په لاس ووژل شي. دا دروازه باید تل تړلې پاتې شي».
نوموړي د ملي اجماع په رامنځته کېدو کې د ځان له اړخه رول لوبونې ته تیاری ښودلی دی.
اشرف غني دغه راز په خپل پیغام کې، چې په پښتو، دري او ازبکي ژبو خپور شوی، په خیبر پښتونخوا او بلوچستان کې د ولسونو وضعیت هم یاد کړی او ویلي یې دي، چې « په خیبرپښتونخوا او بلوچستان کې زموږ خویندې او وروڼه ورته درد زغمي چې هغه هم زموږ خپل درد دی».
دا له شاوخوا شپږ میاشتې ځنډ وروسته لومړی ځل دی، چې مخکینی ولسمشر د افغانستان او سیمې د وضعیت په تړاو خپل نظر څرګندوي.
تراوسه دا روښانه نه ده، چې اشرف غني لاهم په متحده عرب اماراتو کې اوسیږي او که له دغه هېواده وتلی دی.
