طالبانو په هلمند کې له پاکستان نه د ۱۲۷۶ کارتنه قاچاقي درملو د نیولو خبر ور کړی

دغه موټرچلوونکي وایي، که څه هم طالب چارواکي دوی ته د بېرته ستنېدو اجازه ورکوي، خو د پاکستان له لوري د «کلیرنس» نه ترلاسه کېدو له امله نه شي کولای له تورخم واوړي او خپلو کورونو ته ستانه شي.

دغه موټرچلوونکي زیاتوي چې د اوږدې مودې بند پاتې کېدو له امله له سختو اقتصادي، رواني او کورنیو ستونزو سره مخ شوي دي. دوی زیاتوي چې لوی اختر رانږدې دی، خو لا هم نه پوهېږي چې خپلو کورنیو ته به ورشي او له هغوی سره به دغه خوښي ونمانځي او که نه.

د دغو موټرچلوونکو په وینا، په کورونو کې یې د قربانۍ، خوراکي توکو او نورو ورځنیو لګښتونو لپاره بل سرپرست نشته او کورنۍ یې له سختو مالي ستونزو سره مخ دي.

یو موټرچلوونکي وویل: «موږ له دواړو حکومتونو غوښتنه کوو چې زموږ ستونزې حل کړي. دلته په تکلیف کې پاتې یو، نه کار شته او نه د تګ اجازه. یوازې غواړو خپلو کورونو ته ولاړ شو».

موټرچلوونکو له پاکستاني حکومت او طالب چارواکو غوښتي چې د دوی د بېرته ستنېدو لپاره عاجل او عملي میکانیزم جوړ کړي، څو تر اختر مخکې خپلو کورونو ته ورسېږي.

تورخم سوداګریزه لاره له تېرو اتو میاشتو راهیسې د طالبانو او پاکستاني ځواکونو ترمنځ د نښتو له امله تړل شوې او دواړو خواوو ته مسافر، موټرچلوونکي او افغان کډوال له ګڼو ستونزو سره لاس او ګریوان دي.

د طالبانو له پېښو سره د مبارزې امادګۍ ادارې ویلي، چې د دې ادارې او د سلوانیا د بهرنیو چارو وزارت د پلاوي ترمنځ د ماین پاکۍ، د پېښو مدیریت او روغتیايي کلینیکونو د ملاتړ په اړه تخنیکي غونډه شوې ده.

د یادې ادارې په وینا، په غونډه کې د طالبانو له لوري د ماین پاکۍ د انسجام او همغږۍ رییس نورالدین رستم‌خېل او د نړیوالو اړیکو د ریاست سرپرست برهان‌الدین شینواري ګډون کړی و. د سلوانیا له لوري د دغه هېواد د بهرنیو چارو وزارت د بشري مرستو او انساني همکاریو عمومي رییس ادوینس اسکرت حضور درلود.

له پېښو سره د طالبانو د مبارزې امادګۍ اداره وایي، په ناسته کې د افغانستان د ماین پاکۍ پروګرام د فعالیتونو په اړه معلوماتي پرېزنټېشن هم وړاندې شوی دی.

همدارنګه دواړو لوریو د ماین پاکۍ په برخه کې پر شته ستونزو او اړتیاوو، د اړوندو بنسټونو ترمنځ د همغږۍ پر پیاوړتیا، د بشردوستانه پروګرامونو لپاره د تخنیکي او مالي ملاتړ پر جلب او د ماینونو او ناچاوده توکو له امله د رامنځته کېدونکو خطرونو د کمولو په تړاو د ګډو همکاریو پر پراختیا خبرې کړې دي.

د طالبانو د ریاست الوزرا د اداري معاونیت دغه مکتوب دوه اونۍ وړاندې ددې ډلې د معاشاتو او تشکېلاتو د تنظیم کمېسیون له خوا تایید شوی دی.

د مکتوب د متن له مخې ، په ټول افغانستان کې د طالبانو د دیني مدرسو د مدرسینو معاش لوړ شوی دی.

طالبانو د معاشونو د اضافه کولو دلیل «د پوهنې کیفیت لوړول او د راتلونکي نسل ښه روزل» بللي دي.

د وړاندیز د طالبانو رییس الوزرا ملامحمد حسن اخوند هم لاسلیک کړی دی.

طالبانو له بیاځلي واک ته رسېدو وروسته په هر ولایت او ولسوالیو کې دیني او جهادي مدرسې جوړې کړې دي.

تېرکال د طالبانو ویاند ذبیح‌الله مجاهد ویلي وو، چې د یادې ډلې د پوهنې وزارت تر چتر لاندې دا مهال په افغانستان کې تر ۲۰زره ډېرې مدرسې فعالې دي. د هغه په وینا، شاوخوا دوه نیم میلیونه زده‌کوونکي په دغو مدرسو کې دیني زده کړې کوي.

طالبانو د خپلو دیني ښوونکو یا هم مدرسینو شمېر نه دی ښودلی.

د شنونکو په باور، دې ډلې واک ته له بیا رسېدو وروسته خپل ډېر تمرکز په جهادي مدرسو، جوماتونو او د دیني بنسټونو پر جوړولو کړی خو له دې سره سره، نړۍوالو او د بشري حقونو بنسټونو د مدرسو د شمېر دېرېدو په اړه اندېښنه څرګنده کړې ده.

په ورته وخت کې د ښوونځیو ښوونکي نیوکه کوي، چې طالبان یې معاشونه په ځنډ ور کوي.

د افغانستان انټرنشنل د یو راپور پر بنسټ د هېواد زرګونه ښوونکي له دوو میاشتو راهیسې د خپلو معاشونو د نه ترلاسه کولو له امله له سخت اقتصادي فشار سره مخ دي.

سرچینې وایي چې د طالبانو د مشر ملاهبت الله اخوندزاده د دفتر په ولایتونو کې مدرسو ته د اختر په مناسبت مېلیونونه افغانۍ ځانګړې کړې دي.

د طالبانو د ارشاد، حج او اوقافو وزارت د سې شنبې په ورځ وویل، چې د ذوالحجې میاشتې د نهمې نېټې (د عرفې ورځې) په رارسېدو سره افغان حاجیان چې له وړاندې د ترویه په ورځ له مکې مکرمې څخه منی ته لېږدول شوي وو، د عبادتونو له ترسره کولو وروسته نن سهار په موټرو کې عرفات میدان ته ولېږدول شول.

د وزارت د معلوماتو له مخې، حاجیان په منی کې د پنځه وخته لمونځونو تر کولو، ذکر، تلبیې او دعاوو وروسته د حج د لوی رکن (وقوف عرفه) د ادا کولو لپاره عرفات ته انتقال شول.

یاد وزارت ویلي، چې د دغه بهیر د تنظیم چارې ددوی د ساحوي کمېټو او د سعودي عربستان د اړوندو ادارو او خدماتي شرکتونو ترمنځ د همغږۍ له مخې پرمخ تللې دي.

وزارت ویلي، چې افغان حاجیان په عرفات میدان کې خپلو ځانګړو خیمو ته رسېدلي دي.

د طالبانو د ارشاد، حج او اوقافو وزارت ویلي چې حاجیان به د لمر تر پرېوتو پورې د عرفات په میدان کې وي.

په ورته وخت کې ځینو افغان حاجیانو شکایت کړی، چې ددوی د استوګنې سیمې له مسجدالحرام نه لرې دي او دوی ته په تګ او راتګ کې ګڼې ستونزې وي.

د طالبانو د کندهار په ښاروالۍ کې سرچینو نن سې شنبه د غبرګولي پر ۵مه وویل، چې دغه۶۱ مړي د روان ۱۴۰۵ کال د غويي پر ۱۵ مه نېټه ښخ شوي دي.

طالبانو تراوسه ددې مړو د هویت په اړه څه نه دي ویلي او نه هم دوی د مړو ښخولو په اړه څه ویلي دی.

د طالبانو د کندهار ښارولۍ له دې وړاندې هم په دغه ولایت کې د لا وارثه کسانو مړي په هدیرو کې ښخ کړي دي.

تېرکال طالبانو ویلي و، چې ۲۰ تنه لاوارثه مړي یې ښخ کړي دي خو ددغو مړو د هویت او مړینې د څرنګتیا په اړه جزئیات له رسنیو پټ ساتلي دي.

100%

نړیوالو بشري بنسټونو اندېښنه ښودلې چې د طالبانو له بیاځلي واکمنېدو وروسته دې ډلې د افغانستان د تېر حکومت امنیتي ادارو ګڼ غړي په مرموز ډول وژلي او یا هم زنداني کړي دي.

د تېر جمهوریت پرمهال هم ښاروالۍ د لاوارثه کسانو مړي او د کندهار مېرویس روغتون په سړوخونو کې تر اوږدې مودې پاتې کېدونکي مړي په هدیرو کې ښخول.

یو عیني شاهد، چې له دې هدیرې یې ویډیو ثبت کړې ده، ویلي، چې دا هدیره د کندهار ښار په څنډه کې موقعیت لري.

ددغو مړو پر ډبرلیکونو د « اسلامي امارت» او ښاروالۍ نومونه او دغه راز کوډ شمېرې او نېټې لیکل شوې دي، خو د مړو د هویت په اړه جزئیات نه دي ورکړل شوي.

دا هم روښانه نه ده، چې دغه مړي په جګړو کې د طالبانو وژل شوي سرتېري دي او که لا وارثه کسان دي، چې له روغتونونو دلته لېږدول شوي دي.