د هند پر وړاندې لوبو کې د افغان کرکټ لوبډلې مشري حشمت الله شهیدي کوي
د افغانستان کرکټ بورډ اعلان کړی چې حشمتالله شهیدي به د هند پر وړاندې په راتلونکې لوبلړۍ کې د افغانستان د ملي لوبډلې د یو ورځنیو او ټیسټ لوبو مشري کوي. د هند او افغانستان ټیسټ لوبه د جون له ۶مې تر ۱۰مې او درې یو ورځنۍ لوبې د جون پر ۱۳مه، ۱۷مه او ۲۰مه کیږي.
کرکټ بورډ د سې شنبې په ورځ د دې لوبلړۍ لپاره دوه جلا ۱۵ کسیزې لوبډلې اعلان کړې،چې یوه د یو ورځنیو لوبو لپاره او بله د یوازینۍ ټیسټ لوبې لپاره ده او شهیدي به په دواړو کې کپتان پاتې کېږي.
په لوبډله کې ستوري لوبغاړي لکه راشد خان، رحمانالله ګوربز، محمد نبي او عظمتالله عمرزی هم شامل دي.
د یو ورځنیو لوبو په سکواډ کې رحمانالله ګوربز او ابراهیم ځدراڼ د پیل لوبغاړو په توګه راځي. محمد نبي او عمرزی بیا د الراونډرانو په توګه د لوبډلې توازن پیاوړی کوي.
په توپ اچوونکو کې د راشد خان تر څنګ ځوان سپېنر غضنفر او تیز توپ اچوونکي بلال سميع، فرید ملک او ضیاالرحمن شرفي شامل دي.
د ټیسټ لوبې لپاره بیا ځینې بدلونونه راغلي دي. عبدالمالک، رحمانالله ځدراڼ او شرفالدین اشرف په سکواډ کې ور اضافه شوي دي. رحمت شاه او ګوربز خپل ځایونه ساتلي او د ویکټ ساتنې لپاره اکرام علي خېل او افسر ځاځی ټاکل شوي دي.
راشد خان په ټیسټ لوبډله کې شامل نه دی او پر ځای یې قیس احمد، ننگیال خروټی او شرفالدین اشرف اخېستل شوي دي.
د هند او افغانستان ترمنځ ټیسټ لوبه د جون له ۶مې تر ۱۰مې پورې په نیو چندیګړ کې کېږي او وروسته به درې یو ورځنۍ لوبې د جون په ۱۳مه، ۱۷مه او ۲۰مه په ترتیب سره په دهرمشاله، لکنهو او چینای کې کیږي.
