د روسیې د دفاعي صنعت شرکتونو له اوکرایني ډرون الوتکو د ځان ژغورنې لپاره درندې وسلې وغوښتې
روسي شرکتونو له ولادیمیر پوتین سره په یوه ناسته کې ویلي چې دوی چمتو دي د خپلو صنعتي تاسیساتو د دفاع لپاره د درندو وسلو او برېښنايي دفاعي سیستمونو د پېرلو لګښتونه ورکړي، څو د اوکرایني ډرون بریدونو مخه ونیول شي.
د کرملین د رسمي ویبپاڼې له مخې، دا غوښتنه د روسیې د لویو صنعتکارانو او سوداګرو د ټولنې مشر الکساندر شوخین کړې ده.
هغه ویلي چې روسي صنعت، په ځانګړي ډول د تېلو تصفیې کارخونې، د تېلو زېرمې، د سرې تولیدي فابریکې او بندرونه، سږ کال د ډرون بریدونو له ډېرېدو سره مخ دي.
شوخین ویلي چې شرکتونه درندو وسلو، الکترونیکي جنګي سیستمونو، لیزري وسایلو او نورو دفاعي تجهیزاتو ته اړتیا لري.
هغه وړاندیز کړی چې خصوصي شرکتونه د دې تجهیزاتو د پېرلو لپاره لګښت ورکولو ته چمتو دي، خو اړتیا ده چې د تمویل لپاره یو روڼ میکانیزم جوړ شي.
شوخین همداراز له پوتین غوښتنه کړې چې د هغو شرکتونو د مالیاتو او نورو دولتي تادیاتو جریمې معاف شي، چې په بریدونو کې زیانمنې شوې دي.
