د بدن جوړونې په برخه کې یو افغان لوبغاړی عليرضا شهیداني د جرمني په بایرن ایالت کې د نارینهو د فزیک په سیالۍ کې د بدن ښکلا سیالیو اتل شو. له یادې بریا سره، سره شهیداني د جرمني د بدن جوړونې او فزیک ملي لوبډلې په سیالیو کې د ګډون جواز هم ترلاسه کړ.
د جرمني د بدن جوړونې ټولنې او اروپايي اتلتیک د اعلان له مخې؛ د دغه سیالیو په وروستۍ ډلبندۍ کې له عليرضا شهیداني وروسته مورلزا عزیزي دویم ځای خپل کړ او مارکو بیلوس درېیم ځای خپل کړی دی.
د راپورونو له مخې؛ شهیداني په جرمني کې په ملي سیالیو کې هم په بریالیتوب سره فعالیت وکړ او د لومړي مقام د ګټلو سربېره د سیالۍ د «اورال» لقب یې هم ترلاسه کړ.
د کابل ولایت د سوک وهنې ټاکنیزې سیالۍ، چې د طالبانو تر چتر لاندې د المپیک، بدني روزنې او سپورټ ریاست تر سره کړې، له پای ته رسېدو سره ۲۶ تنه ورزشکاران د ولایت د ټاکنیزې لوبډلې لپاره غوره شوي دي.
د یاد ریاست له خوا په خپره شوې خبرپاڼه کې راغلي، په دې سیالیو کې شاوخوا ۶۰۰د ورزش لوبغاړو ګډون کړی و، چې د لویانو په عمري کټګورۍ او ۱۳ بېلابېلو وزني کټګوریو کې سره سیالۍ ته راووتل.
د پایلو له مخې، له دې سیالیو وروسته ۲۶ تنه ورزشکاران د کابل ولایت د سوک وهنې ټاکنیزې لوبډلې غړیتوب ته وټاکل شول.
د طالبانو المپیک، بدني روزنې او سپورټ عمومي ریاست وایي چې د دا ډول ټاکنیزو سیالیو موخه د مسلکي لوبغاړو پېژندل او د ملي لوبډلو لپاره د قوي ترکیب رامنځته کول دي.
د افغانستان د ګډو رزمي هنرونو ملي لوبډلې د اسیا د اتلولۍ په څلورم پړاو (AMMA) سیالیو کې چې په ازبکستان کې ترسره شوې، یو د سپینو زرو او څلور د برونزو مډالونه وګټل. افغانستان په دغه سیالیو کې له ۱۳ لوبغاړو، څلورو روزونکو او یوه پلاوي سره ګډون کړی و.
دغه سیالۍ د ۲۰۲۶کال د مئ له ۲۲مې تر ۲۴مې نېټې پورې د تاشکند په ښار کې د «سنتي MMA» او «عصري MMA» په دوو برخو کې ترسره شوې او د اسیا د بېلابېلو هېوادونو لوبغاړو په بېلابېلو وزنونو کې له یو بل سره سیالي وکړه.
د افغانستان تر ټولو ځلاند استازی په دغه سیالیو کې سمیعالله حمیدي و. دغه ۲۷کلن لوبغاړی د منفي ۶۵ کیلوګرامه وزن په کټګورۍ کې د چین او مغولستان د استازو پر وړاندې له دوو ارزښتناکه بریاوو وروسته پایلوبې ته ورسېد او په پای کې یې د سپینو زرو مډال ترلاسه کړ.
حمیدي لومړی د چین تایپې «چيلو لي» له درېېو پاڼیو وروسته مات کړ، وروسته یې د مغولستان «ادیا انتانګرال» ناکاوټ کړ. هغه په پایلوبه کې د ازبکستان د حسنالدین نصرالدینوف پر وړاندې ماتې وخوړه. د هغه روزونکو او خپله حمیدي باور لاره، چې د کوربه هېواد د لوبغاړي ضربه خطا وه؛ خو قاضیانو او تنظیموونکو د ازبکستان د استازي بریا تایید کړه.
د افغانستان څلور د برونزو مډالونه احمدرضا اېماق، پروېز کاپیساوال، نصرتالله جلالي او احمد واسر مردان ترلاسه کړل. احمدرضا اېماق د عصري MMA د منفي ۹۶ کیلوګرامه وزن په سیالیو کې د مغولستان د مونګونشاغای پر وړاندې مات شو؛ خو په دغه وزن کې د یوازې پنځو لوبغاړو د ګډون له امله یې د برونزو مډال وګاټه.
پرویز کاپیساوال هم د سنتي MMA د منفي ۵۶ کیلوګرامه وزن په سیالیو کې د ازبکستان د عبدالسالیموف پر وړاندې ماتې وخوړه؛ خو د څلورو لوبغاړو د حضور له امله درېیم مقام ته ورسېد او د برونزو مډال یې ترلاسه کړ.
نصرتالله جلالي د عصري MMA د منفي ۱۲۰ کیلوګرامه وزن په سیالیو کې د قزاقستان د اګالي خاسانوف لهخوا ناکاوټ شو؛ خو د ګډونوالو د کم شمېر له امله یې د برونزو مډال ترلاسه کړ.
احمد واسر مردان هم د سنتي MMA د منفي ۸۵ کیلوګرامه وزن په سیالیو کې د قزاقستان د الزاس یسکارایف پر وړاندې مات شو؛ خو په دغه وزن کې د یوازې درېیو ورزشکارانو د ګډون له امله یې د برونزو مډال وګاټه.
د افغانستان نورو لوبغاړي ونه توانېدل، چې د پام وړ پایلې ترلاسه کړي او د سیالیو په لومړیو پړاوونو کې له لوبو بهر شول.
احمد قیومي د سنتي MMA د منفي ۶۵ کیلوګرامه وزن په سیالیو کې د ایران د فرشید باقري پر وړاندې مات شو او د ۱۴ لوبغاړو ترمنځ یې نهم مقام ترلاسه کړ. حکمتالله رحیمي هم د ۷۷ کیلوګرامه وزن په سیالیو کې د فلیپین د کارلو الوارز پر وړاندې مات شو او نهم مقام یې خپل کړ.
د عصري MMA په برخه کې حبیبالله نجیب د منفي ۷۱ کیلوګرامه وزن په سیالیو کې د قزاقستان د مارات اشمتایف پر وړاندې مات شو او اووم مقام یې وګاټه. یوسف نظري د منفي ۵۶ کیلوګرامه وزن په سیالیو کې د ټایلنډ د کریتسادا پر وړاندې مات شو او نهم مقام یې ترلاسه کړ.
خلیل ارسلاني د منفي ۶۰ کیلوګرامه وزن په سیالیو کې د قزاقستان د الزات اسیف پر وړاندې مات شو او نهم شو. سید اجمل کمال د منفي ۷۱ کیلوګرامه وزن په سیالیو کې د هانګکانګ د ډریک یوک لهخوا ناکاوټ شو او نهم مقام یې ترلاسه کړ.
محمد لودین هم د منفي ۸۵ کیلوګرامه وزن په سیالیو کې د ایران د حسین بهمني لهخوا ناکاوټ شو او د ۱۱ لوبغاړو ترمنځ یې ګډ نهم مقام ترلاسه کړ. احمد فتاح پوپلزي بیا د منفي ۷۷ کیلوګرام وزن په سیالیو کې د مغولستان د اورتانسان پر وړاندې په لومړي راونډ کې ناکاوټ شو او پنځم مقام یې خپل کړ.
د سیالیو د تنظیموونکو په وینا؛ دغه سیالۍ په اسیا کې د MMA تر ټولو مهم رسمي پړاو ګڼل کېږي او د قارو په کچه د اتلانو د ټاکلو تر څنګ د ۲۰۲۶کال ناګویا اسیايي لوبو او په ریاض کې د اسیا د رزمي هنرونو او سالني لوبو شپږم پړاو ته د غوراوي وروستۍ پړاو هم بلل کېږي.
د افغانستان کرېکټ بورډ وايي، د ۱۹ کلنو ملي لوبډلې لپاره د ۱۹ کلنو لوبغاړو د غوراوي سیالیو لومړۍ برخه چې ۹ ورځې مخکې پیل شوې وه، نن (دوشنبه د غبرګولي ۴مه) پایته رسېږي. د بورډ په وینا، د دغو سیالیو دویمه برخه به ۷ ورځې وروسته پیل او ۱۴ ورځې به دوام وکړي.
د افغانستان کرېکټ بورډ د یکشنبې په ورځ (د غبرګولي ۳مه) د یوې خبرپاڼې په خپرولو سره وايي، د ۱۹ کلنو ملي لوبډلې لپاره د ۱۹ کلنو لوبغاړو د غوراوي د پروسې خپلمنځي سیالۍ د تېرې یکشنبې په ورځ (د غويي ۲۷مه) د خوست په رحمت ولي مسرور کرېکټ لوبغالي پيل شوې او نن (دوشنبه د غبرګولي ۴مه) پایته رسېږي.
د خبرپاڼې لهمخې، د دغو سیالیو دویمه برخه به د غبرګولي پر ۱۰مه پيل شي او ۱۴ ورځې به دوام وکړي.
په خبرپاڼه کې راغلي، په دغو سیالیو کې د کورني کرېکټ د دویمې او لومړۍ درجې ولایتي سیالیو او د چټکې توپ اچونې په برخه کې د ازادې سیالۍ د موندل شویو لوبغاړو په ګډون په ټوله کې ۶۴ لوبغاړي ګډون لري او په ۴ لوبډلو وېشل شوي دي.
د یادونې وړ ده، چې دغه بهیر د روزنیزې ډلګۍ او د غوراوي کمېټې غړو له لوري له نږدې څارل کیږي او په پای کې به ترې له ۳۰ تر ۳۵ غوره لوبغاړي د چمتووالي د راتلونکو کمپونو لپاره غوره شي.
د طالبانو تر چتر لاندې د اولمپیک بدني روزنې او سپورټ اداره وایي، چې افغان ورزشکاران نن د ازبکستان په کوربتوب د اسیایي رزمي ورزشونو په سیالیو کې د طلا او برنزو مډالونو لپاره مهمې سیالۍ لري، چې پکې د طلا مډال لپاره یوه کلیدي مقابله او د برنزو لپاره بله سیالي شامله ده.
د بدني روزنې او اولمپیک عمومي رییس احمدالله وثیق، په خپل ایکس پیغام کې ویلي چې افغان ورزشکار، سمیعالله حمیدي، نن له خپل ازبکستاني سیال سره د طلا مډال لپاره سیالي او بل افغان ورزشکار، واسر احمد، په ۸۵ کیلوګرام وزن کې د برنزو مډال د ترلاسه کولو لپاره سیالي لري.
د وثیق په وینا، دا سیالۍ د ازبکستان په کوربتوب د اسیایي اولمپیکي سیالیو ته د لار موندنې په هدف ترسره کېږي او تر دې دمه افغان ورزشکارانو پکې د پام وړ پایلې ترلاسه کړې دي.
نوموړي ویلي چې افغان لوبغاړي لا هم د نورو مډالونو د ګټلو چانس لري او هیله یې څرګنده کړې چې دوی به په دې سیالیو کې لا نورې لاسته راوړنې هم ولري.
په اسټرالیا کې مېشتې د افغانستان د ښځینه کرکټ لوبغاړې، چې د طالبانو له واکمنېدو وروسته له هېواده وتلي، د کرکټ له نړیوالې شورا څخه غواړي چې د «افغان ښځینه ۱۱ کسیزې لوبډله» په رسمي ډول د افغانستان د ملي لوبډلې په توګه وپېژني او وایي د دوی د کلونو مبارزه باید بې پایلې پاتې نه شي.
د راپور له مخې، له هغو ۲۵ لوبغاړو څخه چې شپږ کاله مخکې د افغانستان کرکټ بورډ له لوري ورسره رسمي قراردادونه شوي وو، ۲۲یې اوس په اسټرالیا کې ژوند کوي. دغو لوبغاړو د «افغان ښځینه یوولس کسیزه لوبډله» جوړه کړې او د اسټرالیا په بېلابېلو سیمو کې مېشتې دي.
د دغې لوبډلې یوه غړې فیروزه افغان، ویلي چې دوی په خپله خوښه هېواد نه دی پرېښی، بلکې د ژوند او خپلو هیلو د ژغورلو لپاره وتلو ته اړې شوې دي.
هغې ویلي: «موږ نه غوښتل هېواد پرېږدو، بلکې اړ شوو چې د خپلو خوبونو د ژوندي ساتلو لپاره دا کار وکړو.»
فیروزه زیاتوي چې له جلاوطنۍ راهیسې د دوی تر ټولو مهمه پوښتنه دا وه چې کله به د افغانستان د ملي لوبډلې په توګه په رسمیت وپېژندل شي.
هغې ویلي: «موږ له خلکو سره خبرې وکړې، مرکې مو وکړې او هڅه مو وکړه نړۍ ته وښیو چې د افغانستان د ښځینه کرکټ لوبډله لا هم شته او خپلې مبارزې ته دوام ورکوي.»
د راپور پر بنسټ، د طالبانو تر واکمنۍ وروسته ښځینه لوبغاړې اندېښمنې وې چې که په افغانستان کې پاتې شي، د جدي ګواښونو او حتی د وژل کېدو له خطر سره به مخ شي.
د افغانستان د ښځینه فوټبال لوبډلې د نړیوال رسمیت وروستۍ پرېکړې دغو لوبغاړو ته نوې هیلې ورکړې دي. د روان کال په اپرېل میاشت کې د فوټبال نړیوال فدراسیون د افغان ښځینه فوټبال د یوې جلا لوبډلې د رسمیت پرېکړه وکړه او اجازه یې ورکړه چې له ۲۰۲۸ کال څخه په نړیوالو سیالیو کې ګډون وکړي.
د ښځینه سپورټ د ملاتړ فعاله او د سپورټ د روڼتیا کارپوهه، ډاکټره کاترین اورډوې، ویلي چې که افغان ښځینه کرکټ لوبغاړو ته د خپل هېواد تر بیرغ لاندې د لوبېدو فرصت ورکړل شي، دا به د نړۍ او افغانستان لپاره یو مهم پیغام ولري.
هغې ویلي: «دا به د نړۍ کرکټ مینهوالو او افغانستان ته یو پیاوړی پیغام ورکړي چې ښځې شته، غږ لري او کرکټ لوبولی شي.»
د راپور له مخې، د کرکټ نړیواله شورا اوس مهال د دغې لوبډلې د تمرینونو مالي ملاتړ کوي، خو ټاکل شوې دا مرسته د روان کال په اګست کې پای ته ورسېږي. خو تر اوسه د لوبډلې د رسمي پېژندنې په اړه کومه روښانه پرېکړه نه ده شوې.