ایران پر امریکا تور لګولی چې هرمزګان سیمه کې یې اوربند نقض کړی
د ایران د بهرنیو چارو وزارت په یوه تازه اعلامیه کې امریکا تورنه کړې چې په هرمزګان سیمه کې یې له اوربنده سرغړونه کړې ده. تهران ویلي، د امریکا پوځ په تېرو ۴۸ ساعتونو کې پر ایراني سوداګریزو بېړیو څو بریدونه او «پاروونکي اقدامات» کړي دي.
د ایران د بهرنیو چارو وزارت په اعلامیه کې راغلي، دغه اقدامات د نړیوالو اصولو او د اوربند له روحیې سره په ټکر کې دي او واشنګټن باید د دې «پاروونکو کړنو» مسوولیت ومني.
تهران همداراز ویلي، د امریکا دا اقدامات د سیمې ثبات او امنیت ته ګواښ دی او د وضعیت د لا خرابېدو سبب کېدای شي.
