د امریکا د بهرنیو چارو وزارت: ټرمپ د تهران د اټومي پروګرام پر وړاندې پرېکنده اقدام کړی
د امریکا د بهرنیو چارو وزارت ویاند ټامي پیګوټ وایي، چې ټرمپ د تهران د اټومي پروګرام پر وړاندې پرېکنده اقدام کړی. هغه پر اېکس خواله رسنۍ لیکلي: «له لومړۍ ورځې راهیسې ولسمشر ټرمپ دا روښانه کړې، چې ایران نهشي کولی اټومي وسله ترلاسه کړي».
نوموړي زیاته کړه، ټرمپ په دې برخه کې د ډاډ ترلاسه کولو لپاره پرېکنده ګامونه پورته کړي.
له بل پلوه تېره ورځ د امریکا ولسمشر ډونالډ ټرمپ ویلي و، چې د ایران غني شوي یورانیم باید سملاسي امریکا او یا هم د ایران په همغږۍ په بل ځای کې لهمنځه یوړل شي. ټرمپ پر «ټروت» خواله رسنۍ لیکلي، چې دغه کار باید د اټومي انرژۍ د نړۍوالې ادارې (IAEA) یا ورته یوې بلې باصلاحیته ادارې تر څار لاندې ترسره شي.
دغه څرګندونې داسې مهال کېږي، چې امریکایي چارواکي وایي له ایران سره د لومړنۍ هوکړې لپاره خبرې روانې دي. بلخوا د امریکا د بهرنیو چارو وزیر مارکو روبیو ویلي، چې تېره ورځ په قطر کې خبرې روانې وې او زیاته کړې یې ده: «د لومړنۍ هوکړې د متن پر سر لا هم خبرې اترې روانې دي».
روبیو همداراز ویلي، چې د هوکړې د متن وروستي کول ښايي «څو ورځې وخت ونیسي». د دوشنبې په شپه الجزیرې راپور ورکړ، چې د قطر منځګړیتوب د امریکا او ایران ترمنځ د تهران د کنګل شویو شتمنیو په اړه یوې هوکړې ته د رسېدو لامل شوی دی.
