د جوزجان اوسېدونکی: طالبانو خلک نهدي پرېښي چې په خپلو سیمو کې د اختر لمونځ ادا کړي
د جوزجان یوه اوسېدونکي افغانستان انټرنشنل ته ویلي، طالبانو خلکو ته اجازه نهده ورکړې چې د خپلې سیمې جوماتونو کې د اختر لمونځ ادا کړي چې دغه چاره د پراخې ګڼېګوڼې لامل شوې. د هغه په وینا؛ په تېرو کلونو کې د دغه ولایت اوسېدونکو د لوی اختر لمونځ د خپلې سیمې په جوماتونو کې ادا کاوه.
هغه وایي: «په تېرو کلونو کې د دغه ولایت خلکو د لوی اختر لمونځ د خپلې سیمې په جوماتونو کې ادا کاوه؛ خو سږکال طالبانو د یوې خبرتیا په خپرولو له خلکو غوښتي، چې د شبرغان ښار په حضوري چمن کې د اختر لمونځ ادا کړي».
نوموړي زیاته کړې، د ډېرې ګڼېګوڼې له امله خلک لالهانده شوي او ځينې يې ونه توانېدل چې د اختر لمونځ ته ځان ورسوي. د هغه لهخوا په استول شوې ویډیو کې په حضوري چمن کې د خلکو پراخه ګڼهګوڼه ښکاري. هغه وایي، ګڼهګوڼه تر دې حده زیاته ده چې ښایي کمېدل یې ساعتونه وخت ونیسي.
دا په داسې حال کې ده، چې طالبانو تر دې وړاندې د کابل په ګډون په ټولو ولایتونو کې د اختر لمونځ لپاره جوماتونه ځانګړي کړي وو او له خلکو یې غوښتنه کړې وه، چې د اختر لمونځ لپاره یادو جوماتونو ته ورشي.
