د لبنان روغتیا وزارت وايي، د سېشنبې په ورځ د لبنان پر سویلي سیمو د اسراییل په هوايي بریدونو کې لږترلږه ۳۱ کسان وژل شوي او شاوخوا ۴۰ نور ټپیان دي. د راپورونو له مخې؛ دغه بریدونه د برج الشمالي، کوثریه الرز، حبوش، معرکه او سلع په ښارګوټو او کلیو شوي دي.
د لبنان دولتي خبري اژانس (اېناېناې) ویلي، یوازې په برج الشمالي سیمه کې په یوه برید کې لږترلږه ۱۰ کسان وژل شوي چې ښځې او ماشومان هم پهکې شامل دي. دغه اژانس راپور ورکړی، چې د ختیځ لبنان د قرعون بند ته نږدې لږترلږه درې هوايي بریدونه شوي دي. قرعون بند د لبنان د اوبو تر ټولو لویه زېرمه بلل کېږي.
دغه بریدونه وروسته له هغې شوي، چې د اسراییل لومړي وزیر بنیامین نتنیاهو ګواښ وکړ چې د حزبالله له لوري پر اسراییلي ځواکونو د بېپیلوټه الوتکو بریدونو په غبرګون کې به بریدونه لاپسې سخت کړي.
د لبنان د رسمي شمېرو له مخې؛ اسراییل د روان کال د مارچ له دویمې نېټې راهیسې پر لبنان خپل پراخ پوځي عملیات روان ساتلي، چې له امله یې نږدې ۳زره او ۲۰۰ کسان وژل شوي، تر ۹زره او ۶۰۰ ډېر ټپیان شوي او څه باندې ۱.۶ مېلیونه خلک بېځایه شوي دي.
