د طالبانو رییس الوزرا ملاحسن اخوند په خپل اختریز پيغام کې د کډوالو او اړمنو کسانو د لاسنیوي غوښته کړې ده. د هغه په وینا؛ په دې وروستیو کې په مېلیونونه کډوال له ګاونډیو هېوادونو ستانه شوي او یا د ځینو پېښو له امله یوشمېر خلک له خپلو سیمو بېځایه شوي دي.
نوموړي له دغه کډوالو او بېځایه شویو سره د مرستو پر دوام ټینګار کړی او زیاته کړې یې ده، چې ادارې یې تر خپل وسه پورې له دغه راستنېدونکو کډوالو، بېځایه شویو او اړمنو کسانو سره مرسته کړې. هغه دارنګه له خلکو غوښتنه کړې، چې د اختر په ورځو کې له خپلو بېوزله هېوادوالو سره مرسته وکړي.
تر دې وړاندې د افغانستان د پخواني جمهوري نظام پر مهال اجراییه رییس ډاکټر عبدالله عبدالله هم د لوی اختر په مناسبت په خپل پیغام کې له سوداګرو او شتمنو هېوادوالو غوښتي و، چې په دې مبارکو ورځو کې له اړمنو او بېوزله کسانو سره مرسته وکړي.
له بل پلوه نړۍوال بانک په خپل میاشتني راپور کې ویلي، د افغانستان اقتصاد سره له دې چې محدوده وده کړې؛ خو لاهم له جدي ننګونو سره مخ دی. د دغه سازمان په وینا؛ د نفوس او انفلاسیون زیاتوالي او د بهرنیو مرستو کمښت د خلکو پر معیشت فشار زیات کړی او د خلکو د ژوند کچه یې کمزورې کړې ده.
