د هرمز تنګي کړکېچ د افغانستان سوداګري او بشري مرستې له خنډ سره مخ کړې دي
د افغانستان سوداګر او مرستندویه ټولنې وايي، د هرمز تنګي کړکېچ او له پاکستان سره د لارو تړل پاتې کېدو ستونزو له امله د افغانستان سوداګري او بشري مرستې له جدي خنډ سره مخ شوې دي.
د افغانستان سوداګر او مرستندویه ټولنې وايي، د هرمز تنګي کړکېچ او له پاکستان سره د لارو تړل پاتې کېدو ستونزو له امله د افغانستان سوداګري او بشري مرستې له جدي خنډ سره مخ شوې دي.
وروسته له هغې چې د طالبانو او پاکستان ترمنځ د نښتو له امله پر ډیورنډ کرښه ټولې لارې وتړل شوې، ډېری افغان سوداګرو او مرستندویه بنسټونو د پاکستان د کراچۍ بندر پر ځای له بندر عباس کار اخیست؛ خو اوس د هرمز تنګي کړکېچ دغه لاره هم له ستونزو سره مخ کړې ده.
د خوړو نړۍوال پروګرام ویلي، په افغانستان کې د خوارځواکو مېندو او ماشومانو لپاره د خوړو مرستې سختې اغېزمنې شوې دي. د یادې ادارې په وینا؛ د لېږد لګښتونه څو برابره لوړ شوي او د خوراکي توکو زېرمې هم کمې شوې دي.
په افغانستان کې د خوړو نړۍوال پروګرام مشر جان ایلیف ویلي، په داسې حال کې چې خوارځواکي نږدې بېسارې کچې ته رسېدلې؛ ډېری مېندې او ماشومان د مرستو نشتوالي له امله له روغتیايي مرکزونو تش لاس ستنېږي.
د راپور له مخې؛ هغه انتقالات چې پخوا به د دوبۍ او ایران له لارې افغانستان ته رسېدل، اوس د سعودي عربستان، اردن، ترکیې، جورجیا، اذربایجان او ترکمنستان له اوږدو لارو افغانستان ته انتقالېږي، چې خورا ډېر وخت نیسي او لګښتونه هم لوړوي.
په کابل کې سوداګرو هم شکایت کړی، چې د مالونو د لېږد بیې څو برابره لوړې شوې دي. یوشمېر سوداګر وايي، له چین نه د یوه بار د انتقال لګښت له څه باندې زرو ډالرو څخه تر ۱۵زره ډالرو پورته شوی دی.
بل لور ته د طالبانو د صنعت او سوداګرۍ وزارت ویلي، ډېره سوداګري اوس د منځنۍ اسیا له لارې ترسره کېږي او هڅه روانه ده چې بدیلې لارې پرانیستې وساتل شي. د افغانستان د سوداګرۍ او پانګونې خونې بیا ویلي، دامهال د افغانستان له ۶۰ سلنې ډېره سوداګري د منځنۍ اسیا له لارې ترسره کېږي؛ څو د ایران او پاکستان د لارو ستونزې جبران شي.
