د پاکستان په قامي اسمبلۍ کې د اپوزېسیون مشر محمودخان اڅکزي ویلي، که د پاکستان پخواني لومړي وزیر عمران خان پر ضد روان چلند همداسې دوام وکړي او هغه ته درنې سزاګانې واورول شي؛ نو سیاسي کړکېچ به نور هم ژور شي.
د هغه په وینا؛ که وضعیت همداسې دوام وکړي، نو د تحریک انصاف او د هغه ملګرو ګوندونو لهخوا د پاکستان قامي اسمبلۍ او سنا د پرېښودو احتمال به زیات شي. اڅکزي وویل، د عمران خان ګوند د خلکو په رایو ټاکنې ګټلې وې؛ «غلا شوی واک» ورته نهدی سپارل شوی.
هغه ادعا کړې، چې په وروستیو ټاکنو کې د خلکو اراده بدله شوې او د پاکستان سیاسي نظام د «بازار» بڼه خپله کړې ده. نوموړي د پاکستان پر عدلیې سیسټم، رسنیو او واکمنو سختې نیوکې کړې او ویلي یې دي، چې په هېواد کې «انصاف او د بیان ازادي» لهمنځه تللې ده.
د هغه په وینا؛ خلک اوس د خپلو حقونو لپاره د شکایت ځای نهلري او عام وګړي د زورواکو پر وړاندې بېوسه شوي دي. محمود خان اڅکزي د پاکستان پر واکمنو او ځینو سیاسي ګوندونو هم نیوکه وکړه او ویې ویل، هغه ګوندونو چې پخوا یې د جمهوریت لپاره مبارزه کړې وه؛ اوس یې د «جمهوريت ضد کړنو» ملاتړ کړی دی.
هغه د مولانا فضل الرحمان، نواز شریف او نورو سیاسي مشرانو نومونه واخیستل او غوښتنه یې وکړه، چې ټول لوري دې د هېواد د ژغورلو لپاره یوې ګډې هوکړې ته ورسېږي. اڅکزي وویل، د ستونزو یوازینۍ حل لاره «معناداره خبرې دي» او باید ټول سیاسي خوځښتونه، پوځي واکمن او ادارې په ګډه د اساسي قانون، پارلمان، خپلواکه عدلي سیسټم او د رسنیو ازادۍ بېرته راژوندي کولو لپاره کار وکړي.
هغه خبرداری ورکړی، که سیاسي فشارونه دوام وکړي او د خلکو رایو ته درناوی ونه شي؛ نو پاکستان به له لا لویو ستونزو سره مخ شي.
