د تېر جمهوري نظام پرمهال د کورنيو چارو وزیر عبدالستار ميرزکوال په خپل اختریز پیغام کې ویلي، چې تر نیمايي زیات افغانان د بېوزلۍ، لوږې او سختو محدودیتونو تر سیوري لاندې اختر نمانځي.
نوموړي زیاته کړې: «له ۵ کلونو وروسته هم د ملي پخلاینې، ملت د حقونو سره سم له ولس سره د لار وړلو او د سیاسي حاکمیت راوستلو لپاره کوم څرک نه لېدل کېږي». میرزکوال په خپل پيغام کې ویلي: «د ټولنې نیمایي برخه مېرمنې له هر ډول بندیز او محدودیتونو لاندې ژوند کوي. ځوانان او په عموم کې تعلیم یافته قشر له نهیلۍ او بېکارۍ سره لاس او ګرېوان دي. د وطن د نمایندګۍ او ملي هویت هر ارزښت سرکوب دی. د ملت مطلق اکثریت د هیڅ راز شکایت، پوښتنې او اعتراض حق نهلري او د راتلونکي لپاره سراسري هیله تته شوې او پر سبا باور کمزوری شوی دی».
د نوموړي په خبره؛ لاهم طالبان «استبداد، سیاسي حذف او د پرمختګ ضد سیاستونو» ته لومړیتوب ورکوي. هغه د پخواني ولسمشر محمد اشرف غني اختریز پیغام ته په اشارې لیکلي: «ټول ملت بیا په خاص ډول هغه ځوانان، سیاسي اشخاص او جوړښتونه چې د وطن په قضیه کې ځانونه مسوول او مکلف ګڼي؛ باید د ډاکټر اشرف غني په نوې بیانیې کې مطرح شویو سوالونو ته داسې ځوابونه ومومي، چې ملي بحث او ډیالوګ ته لار پرانېزي او همدا ملي ډیالوګ بیا وکولای شي، چې راتلونکي سیاسي برخلیک لپاره ولس محوره ملي مېکانیزم تشخیص کړي».
